مبادرة توزيع سناكس على الطلاب
كان لطلاب الثانوية العامة هذا العام، نصيب كبير من المساعدات والمبادرات الخيرية، في ظل إجراء الامتحانات في زمن كورونا، آخرها ما قدمه حامد بندق، أحد المتطوعين بمحافظة بورسعيد، حيث وقف أمام لجان الامتحانات يوزع حقائب تحتوي على أقلام وكمامة طبية وزجاجة كحول وعلبة عصير وكيك، على الطلاب، بهدف تخفيف توترهم ودعمهم نفسياً.
تقوم المبادرة على الجهود الذاتية، بمشاركة أكثر من 30 متطوعاً، يحرصون على جمع التبرعات وشراء بعض المستلزمات والأكلات السريعة للطلاب وتوزيعها، حيث يقول صاحب المبادرة: «نزلنا أول يوم الامتحانات لأكتر من مدرسة على مستوى محافظة بورسعيد كلها».
وزع «بندق» 1000 شنطة في أول أيام الامتحانات: «الطلبة زى إخواتنا وفى كل بيت طالب ثانوية عامة، وفى عز الظروف اللى إحنا فيها بيكونوا متوترين وقلقانين»، مؤكداً أن المبادرة أتت بثمارها، حيث ساهمت فى تحسين حالة الطلبة النفسية قبل دخول الامتحان: «كانوا واقفين على وشهم رعب وقلق، ولما قربنا منهم ووزعنا عليهم الشنط ضحكوا واتبسطوا أن فيه حد حاسس بيهم وبيفكر يفرحهم».
والتزم المتطوعون بالإجراءات الوقائية خلال وجودهم وسط الأعداد الكبيرة للطلاب، وكانوا يرتدون الكمامات الطبية، ويعقمون أنفسهم جيداً: «وإحنا بنوزع ماكناش كلنا فى مكان واحد، قسّمنا نفسنا لأكتر من مجموعة، وكل مجموعة راحت مدرسة عشان نقدر نوزع على عدد كبير، وفى نفس الوقت مانعملش زحمة كبيرة قدام المدارس، ورغم الجو الحر والشمس بس كان يكفينا أننا نشوفهم مبسوطين، وربنا يقويهم على الامتحانات فى الظروف دى، إحنا وراهم وفى ضهرهم لحد ما يخلصوا امتحاناتهم».
تعليقات الفيسبوك