مراوح وكولديرات وسبورات.. موسم التحويل ينعش تبرعات المدارس
مراوح وكولديرات وسبورات.. موسم التحويل ينعش تبرعات المدارس
مراوح سقف وكولديرات مياه وسبورات، قائمة طلبات اشترطتها بعض المدارس الحكومية والخاصة من أولياء الأمور للموافقة على طلبات التحويل لأبنائهم، بينما طلبت مدارس أخرى مبالغ مالية كتبرعات لتطوير المدرسة، رغم تحذير الإدارات التعليمية من عدم الانصياع لهذه الطلبات غير المشروعة.
بسبب تغيير محل سكن هبة جرجس، ربة منزل، اضطرت إلى التقدم بطلب للمدرسة لنقل ابنتها إلى أخرى، بمنطقة عين شمس الغربية، ففوجئت بأن المدرسة الجديدة تطلب منها 1000 جنيه تبرعاً كشرط لقبول ابنتها: "استغربت وقلت لهم إن المبلغ كبير جداً، على الأقل أدفع نصه أو أقسطه، مارضيوش خالص، ولما حسيت إن الفرصة ممكن تضيع ويرفضوا نقل بنتى للمدرسة اضطريت أوافق".
وشاهدت "هبة" أيضاً نماذج أخرى لأولياء أمور طلبوا منهم هدايا كمراوح وسبورات: "كل ولى أمر اعترض تعنتوا معاه فى طلبات التحويل وطبعاً إحنا مضطرين نوافق عشان نمشّى الدنيا ونريح ولادنا"، الموقف نفسه تكرر مع محمود كارم، ولى أمر طالبة فى الصف الأول الثانوى، حيث طالبته إدارة المدرسة بالتبرع بكولدير مياه، كشرط أساسى لقبول ملف تحويل ابنته: "اتفاجئت بالطلب بتاعهم ومش متخيل إن لسه فيه مدارس بتعمل كده، وطبعاً لو اعترضت وقلت لأ هيوقفوا ورق بنتى، وكنت مضطر إنى أقبل عشان أمشّى أمورى وبنتى ترتاح من مشوار المدرسة التانى البعيد".
وبمجرد شرائه للكولدير والتبرع به، تم قبول ورق ابنته فى الحال، وهو ما اعتبره إهانة فى حق المدارس: "سألت صحاب وجيران ليا عن حكاية التبرعات دى، قالوا لى إن التحويلات فى أغلب المدارس بتمشى بالطريقة دى لازم هدايا أو تبرعات زى ما بيسموها".
