استشارات مجانية في التسويق: الفكرة عليك والباقي على مدحت

التأثير السلبى لأزمة فيروس كورونا على بعض أصحاب المشروعات والشركات الصغيرة والمتوسطة، واضطرار بعضهم لإغلاق مشروعه بعد خسارته، دفع مدحت نبيل، الذى يعمل مستشار تسويق وتنمية أعمال لمشروعات صغيرة ومتوسطة ومطاعم، للتفكير فى تقديم استشارات مجانية لهؤلاء الشباب لمساعدتهم فى تطوير منتجاتهم وتسويقها.

قبل 3 أشهر، بدأ «مدحت» يروج لفكرة مبادرته من خلال موقع «فيس بوك» مع إرفاق رقم هاتفه ليتمكن أصحاب الشركات من التواصل معه، ليفاجأ بإقبال من الشباب على مبادرته: «لما جت كورونا لقيت ناس متضررة كتير، وفيه منهم اللى مش عارف يكمل فى شغله، وفيه اللى خايف ما يعرفش يقف على رجليه بعد انتهاء الأزمة، فقررت أساعدهم بطريقة ما تكونش مكلفة عليهم وتضمن لهم فى نفس الوقت إنهم يفضلوا موجودين فى السوق»، موضحاً أنه يتلقى فى اليوم الواحد أكثر من 200 مكالمة هاتفية ورسالة من بعض الشباب الراغبين فى التسويق لمشروعاتهم وجذب العملاء مجدداً لمشروعاتهم ليتمكنوا من تحقيق أرباح مالية.

لم يكتف «مدحت» بتقديم أفكار للشباب، وإنما يوضح لهم كيفية تنفيذها بطريقة مبسطة، بجانب متابعة كافة الخطوات معهم لضمان تطبيقها بشكل سليم: «مفيش أسهل من الأفكار، الأهم يكون فيه إضافة مختلفة تميزه عن غيره، ويكون ليها احتياج أو تخلق احتياج عند الناس، بحيث إنها تدفعهم يشتروها»، بجانب أنه يقوم بتعليم الشباب تطبيق كافة الخطوات بأنفسهم من خلال الاستعانة ببعض الفيديوهات المتاحة على الإنترنت دون الاعتماد على متخصصين، لتقليل التكلفة: «بيرجعوا لى فى كل خطوة لو بينفذوها بنفسهم، ولو اتعاقدوا مع مصمم أو مطبعة بياخدوا رأيى فى الأسعار، بحاول أشوف لهم أنسب حاجة».

• أصحاب المشروعات
• المشروعات الصغيرة
• استشارات مجانية
• فيروس كورونا
• كورونا
• أصحاب المشروعات
• المشروعات الصغيرة
• استشارات مجانية
• فيروس كورونا
• كورونا