طلبة في مدرسة
طلب غريب آثار استياء عدد كبير من أولياء الأمور الذين قرروا تحويل ملف أبناءهم من مدرسة خاصة إلى أخرى، ليفاجئوا بشرط فرضته عدة مدارس بتسديد 50% من المصروفات الدراسية للعام الدراسي الجديد، كي يتمكنوا من سحب ملفات الطلاب، وصفوا هذه الطريقة التي تعاملوا بها بالاستغلال لأنه ليس من حق هذه المدارس فرض رسوم إضافية عليهم حسب وصفهم، خاصة أن الطالب سيكون مسجل في مدرسة أخرى.
ريهام سمير، ولي أمر طالبة بالمدرسة، من كرداسة، فوجئت بطلب مدرسة طفلها التي تشترطت عليها تسديد 50% من مصاريف العام الدراسي الجديد، بالرغم من تقديم طلب سحب الملف مبكرًا وقبل موعد بدء الدراسة بمدة طويلة: "المدرسة زودت المصاريف علينا السنة دي، فقلت لازم أحول من المدرسة، اشترطوا علينا عشان يوافقوا على طلب التحويل إننا نسدد المبلغ، تخيل لما يبقى المصاريف وصلت لـ18 ألف جنيه، وعاوزنا نسدد نصها عشان نحول، ده استغلال وجشع".
رفضت "ريهام" شرط المدرسة للتحويل، وطلبت من المدرسة ورق رسمي يثبت صحة قولهم، فقوبل بالرفض: "قولنالهم عاوزين إفادة من الوزارة بتقول إننا لازم ندفع 50% من المصاريف، قالولنا ماعندناش، طب اكتبوا إقرار رسمي قالوا مفيش، وحصلت مشادات كلامية بينا وبينهم، وكنا هنطلب البوليس، طلعنا على المديرية قالولنا مافيش الكلام ده وقدمنا شكوى".
هند المصري، ولي أمر، من كرداسة، تعرضت لنفس الموقف، ظلت في المدرسة من الثامنة صباحاً حتى الواحدة ظهراً، تنتظر سحب ملف ابنتها، مماطلة وتعنت من المدرسة، سوء معاملة لا تليق بولي الأمر، وإصرار المدرسة على دفع ولي الأمر للمصاريف الجديدة ليتمكن من التحويل: "قالوا لنا لازم نسدد 50% الأول وهو ده اللي عندنا، بعدين لما قولنا هانعمل محضر وهانصعد الموضوع، فجأة نزلوها لـ10%، عاوزين مننا أي سبوبة وخلاص، ده غير سوء المعاملة، بيقولوا لنا يا تدفع يا مش هتاخد ورق ولادك".
"مش عارفين نعمل إيه، هنضطر نقعد في المدرسة لأننا مش هانقدر ندفع كل ده"، كلمات قالتها هند باستياء موضحة معاناتها مع "مافيا المدارس" على حد وصفها، فكثيرٌ من المصروفات دفعها أولياء الأمور العام الماضي دون فائدة، ترم ثاني لم يذهبوا فيه إلى المدرسة، ومصاريف الأتوبيس الخاص لم تسترد: "المصاريف علينا كتير والسنة دي سنة استثنائية، دفعنا مصاريف الترم التاني على الفاضي ومش راضيين يرجعوا ولا جنيه، ولا مصاريف الباص كمان، إحنا تعبنا وكله على كاهل ولي الأمر".
تعليقات الفيسبوك