أحمد يونس
روى أحمد يونس، مقدم برنامج "صباحك مطرحك" على راديو 9090، كواليس معرفته بالحادث الذي أودى بحياة ابن شقيقته، حيث تلقى الخبر في البرنامج، بعد فترة قصيرة من إذاعته خبر الحادث.
وكتب يونس عبر حسابه الرسمي على موقع التواصل الاجتماعي "فيس بوك": "يوم وفاة ابن اختي 12 أكتوبر الحزين الصبح، كنت في برنامجي الصباحي على الراديو ودايما بيكون عندي تقرير مروري".
وأضاف: "فإذا بي اتبلغ بحادث مروري في التجمع الخامس بين أتوبيس مدرسة وأتوبيس رحلات، وتسبب في وفاة طفل 13 سنة، قلبي وجعني على أم وأبو الطفل وقولت بالحرف يا قهرتهم على ضناهم".
وواصل "يونس": "طلعت من الاستوديو أتأكد من كل زمايلي إن ولادهم وصلوا مدارسهم بسلامة الله، فاتطمنت الحمد لله ورجعت الاستوديو أكمل شغلي كانت الساعة 8:10 الصبح، فإذا بي اتلقى مكالمة تليفونية من أخويا الكبير، بيقولي مصيبة يا أحمد مصيبة، كل توقعي إنه هيقولي أمك ماتت، لكن لاقيته بيقولي مصطفى ابن أختك سماح مات في حادثة أتوبيس مدرسة".
وعبر "يونس" عن رد فعله قائلا: "الجملة نزلت علي صعقتني في كل جسمي، قفلت السكة في وشه وفضلت أقوم واقعد زي المجنون، وأنا مش مدرك اللي سمعته وعمال أقول لا ده أكيد كابوس وهصحى منه أروح الشغل عادي".
واستطرد "يونس" حديثه: "سيبت البرنامج ونزلت أجري وأنا مش عارف أعمل إيه ولا أتصرف إزاي، لحد ما روحت ولقيت الكل موجود عند تلاجة الموتى، ولقيت اختي سماح في ثبات وتماسك ومفيش على لسانها غير راضية يارب، إنا لله وإنا إليه راجعون، الحمد لله، اللهم أجرني في مصيبتي، وبقت تسكتني".
وبحسب "يونس": "لقيت حازم والد حبيبي مصطفى في صمت وذهول عمري ما هنساه، وهنا كل اللي مر عباره عن شريط أسود مفيهوش نقطة بيضا، لحد ما ربنا كرمني إني غسلته بنفسي واتطمنت عليه وخدته في حضني أحن حضن في حياتي كلها".
وأكمل: "أنا عمري ما كنت متخيل إني أغطي حادث وفاة طفل واكتشف إنه ابن أختي ابني وصاحبي وحبيبي، عمري ما كنت متخيل إن الحوادث اللي بنسمع عنها وارد نمر بيها".
واختتم: "حق ابننا مصطفى لن يضيع وإذا أبوه وأمه سكتوا عنه بسبب الفاجعة اللي هم فيها أنا مش هسكت عنه، عارف إنه ابننا مش هيرجع بس على الأقل حبيبي يكون سبب في وجود شوية ضمير عند معدومي الضمير، احضنوا أطفالكم ومتزعلوهمش واسمعوهم وادعو دايما إن ربنا ينجيهم من شر الحوادث والفواجع وادعوا لأم مصطفى وأبوه ولنا ولكل أم فقدت طفلها بالصبر، مع السلامة يا حبيبي".
تعليقات الفيسبوك