رغم تشديد وحدات المرور بمختلف المحافظات على ضرورة ارتداء الكمامات الطبية أثناء استخدام وسائل المواصلات، إلا أن هناك من يتعنت ويخالف هذه القرارات، وهو ما حدث مع خالد المصري سائق أجرة، من أبناء محافظة الإسكندرية، الذي دفع غرامة 50 جنيهاً، بسبب راكب لم يرتد كمامته وعندما رفض دفعها تم سحب رخصته ودفع غرامة 750 جنيها.
«بقول للناس كلها أنا سواق على باب الله وأنا ملتزم بالتعليمات وكنت لابس الكمامة بتاعتي ياريت الزباين تلبس الكمامة عشان أنا مشيلش ذنبها وادفع الغرامة»، هكذا ناشد «خالد» الركاب قبل أن يقوموا بالركوب معه: «اللي حصل أن كان في معايا زبون مش لابس الكمامة وحذرته قال اطلع بس يا اسطى وهتعدي عادي وفي لجنة وقفتنا في جليم دفعوني عن الزبون ده 50 جنيه غرامة ومش الزبون ينزل يشتري كمامة عشان اليوم يعدي محصلش وكملنا عادي ووقفونا في جليم تاني قولت للظابط أنا خلاص دفعت الغرامة قال لي بس برضه مفيش التزام بالكمامات، دفعت غرامة 750 جنيه عشان رفضت ادفع ورخصتي اتسحبت».
ماليش دعوة
ويضيف «خالد»: «أنا عارف أن الحكومة خايفة علينا وعايزنا نلتزم لأننا شعب مش هيلتزم غير لما يتقرص بس أنا كنت لابس كمامتي وملتزم بها لأن كل قرش بشتغل به مش عايزه يروح مني.. وأحياناً الزباين بتحب تكبر دماغها زي اللي حصل معايا من يومين ده وأنا اللي بتحاسب بدلها وبعد اللي حصل ده بقيت بنبه على الزباين يلبسوا الكمامات واللي بيرفض أنا كمان برفض أوصله أنا مش ناقص أدفع كل شوية غرامات».
رغم حزن «خالد» الشديد على دفع هذه الغرامة الفورية، لكنه أصبح حريصا على تحذير الزبائن بارتداء الكمامات: «أنا مش عايز أشيل شيلة مش بتاعتي تاني».
تعليقات الفيسبوك