بريد الوطن.. مش رضا
بريد الوطن
هل السكوت يا ناس علامة للرضا؟
أنا مآمن بالقضا
وبستعيذ من وقعته
من شر قوة قبضته
لكن سكوتى مش رضا
كل الظروف المغرضة
بتلخبط العقل الرزين
هيجيب منين ويروح لفين
وأدّيك لجيبى منفضة
بياع يبيع لى محفضة؟
عايزنى ألمّ المليمين
ويطيروا برضك فى الفضا
ساعة القضا
ومفيش بصيص
لملم عصاتك عننا
بالغصب مش بخطرنا
تاهت مواضع رِجلنا
غامت عينينا كلنا
الحق يا يوسف ضمنا
وانزع فتيل القنبلة
وارمى لنا حتة م القميص
فوق التلال من قمحنا
طايش يا نصل رمحنا
فرتكت ليه السنبلة؟
يا مأجور ومشتاق للعجين
سامح لطف الله
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي bareed.elwatan@elwatannews.com