مفاجأة لطيفة.. الإعلامية دعاء فاروق تكشف تفاصيل زيارتها لـ محمد منير في منزله
مفاجأة لطيفة.. الإعلامية دعاء فاروق تكشف تفاصيل زيارتها لـ محمد منير في منزله
كتبت: ياسمين محمود
كشفت الإعلامية دعاء فاروق عبر حسابها على موقع «إنستجرام» تفاصيل زيارتها للكينج محمد منير، بعد مكالمة هاتفية حدثت بينهما بالصدفة، حينما كان يتحدث هاتفيًا مع إحدى صديقاتها.
زيارة دعاء فاروق لـ محمد منير
ونشرت دعاء فاروق مجموعة من الصور التي تجمعها بمحمد منير، وعلّقت قائلة: «على غرار الصوت الشهير اللي بيقول أنا طلعت في التلفزيون، أنا ممكن أعمل صوت بنفس الانبساط والدهشة بيقول أنا زورت الكينج محمد منير في بيته، وعشان متحتاروش وتقولوا إيه اللي جاب القلعة جنب البحر، الموضوع ببساطة إن ريهام إبراهيم صديقتي الجميلة كانت بتزورني امبارح للاطمئنان علي ديدو ابني، وفي وسط القاعدة تركتها ودخلت المطبخ، وإذا بروكي بنوتي جت تقولي الحقي يا ماما ده ريهام بتكلم محمد منير في التليفون عادي، قلت لها آه يا روكي ما ريهام من أصدقائه المقربين جدًا منذ سنوات طويلة».
وأضافت: «دخلت علي ريهام وقلت لها كواحدة مصرية أصيلة ممكن تحشر نفسها في مكالمة لا تخصها بتاتًا، سلميلنا عليه يا ريهام وقوليله إن كلنا بنحبه، وأعتقد ده العادي بتاع أي كائن مصري سامع صوت محمد منير طالع من السماعة اللي جنبه، فإذا بريهام تقول له طب خد دعاء فاروق عاوزة تكلمك، وكانت مفاجأة لطيفة لأنه لطيف جدًا جدًا لدرجة إني لما بقول له على فكرة جوزي بيحب يسمعك جدًا، وفعلا هو مطرب عماد المفضل، قال لي بمنتهي اللذاذة (الله الله) خلصت المكالمة بكلمات الثناء اللطيفة وأنهيتها بإن شاء الله تيجي فرصة وأشوف حضرتك قريب، فكانت المفاجأة أنه قال لي اتفضلي نوريني مع ريهام بكرة».
دعاء فاروق تشيد بحفاوة استقبال محمد منير لها
واختتمت: «نجم كبير وقيمة كبيرة وعلى قدر نجوميته على قدر تواضعه ولطفه الشديد في استقبالنا، وفرحت جدًا لما قال لي أنه أتفرج عليا النهاردة الضهر في برنامجي، في الصورة ريهام إبراهيم اللي بشكرها بجد على المفاجأة والزيارة الحلوة دي، وعازفة الهارب الجميلة ياسمين حربي اللي اتعرفت عليها من خلال ريهام إبراهيم من سنتين وحبيتها جدًا جدًا، النهاردة 5 مايو 2025 يوم أحب أوثقه، يوم زيارة الكينج محمد منير».
