في حديث مؤثر ومليء بالشجن والذكريات، فتحت الإعلامية القديرة فريدة الزمر قلبها لاسترجاع محطات من حياتها، من الطفولة، وحتى تجربتها المؤلمة مع المرض.

استهلت «الزمر» حديثها مع الإعلامية سناء منصور، ببرنامج «ست ستات»، المذاع على قناة dmc، بالتأكيد على أهمية الأصل والتربية، قائلة: «قلت في مرة: أوعوا تعاندوا القدر.. اختاروا ولاد الأصول اللي ليهم كبير، لأن الإنسان الأصيل لا يُختبر في موقف واحد، وإنما يُقاس في كل تصرف، في أصغر الأمور قبل أكبرها».

وأضافت: «في العلاقات الجديدة، خصوصا لما بنت صغيرة بتتخطب، لازم أهلها يبقوا واعيين، مش دايما الغني هو الصح، لكن الأصيل هو اللي هيسندها بجد».

تجربة المرض.. واكتشاف الذات

عن أصعب مراحل حياتها، روت فريدة الزمر تجربتها مع المرض الخبيث، قائلة: «المرض خلاني أكتشف نفسي من أول وجديد، ربنا كان دايمًا معايا، وساترني، وحوطني برحمته، كنت بتعالج في مصر وأمريكا في وقت واحد، وكان في حوالي ناس بتحبني بصدق».

وكشفت عن قرارها وقتها بالابتعاد عن الناس، قائلة: «انعزلت تمامًا، وقلت لنفسي: إذا كان وداع، يكون بهدوء، وإذا كان شفاء، يبقى بهدوء برضه، الحمد لله ربنا كتب لي الشفاء».

هند: أمي قوية رغم رقتها

من جانبها، تحدثت ابنتها النائبة هند رشاد عن تلك الفترة الصعبة، مؤكدة أن والدتها كانت مثالاً في القوة والصبر: «أمي قوية جدًا، رغم حساسيتها، أول ما عرفنا بخبر المرض كنا في صدمة، بس هي كانت دايمًا بتطمنّي، وبعدين بقيت أنا اللي شايلة مسؤولية قرارات العلاج، كانت مؤمنة جدًا بالله، ومتمسكة بالقرآن والدعاء».

• فريدة الزمر
• صباح الخير يا مصر
• سمير صبري
• ست ستات
• سناء منصور
• DMC