«عروسة وحصان على قديمه».. «عم ربيع» يصنع حلوى المولد النبوي بالغربية
«عروسة وحصان على قديمه».. «عم ربيع» يصنع حلوى المولد النبوي بالغربية
أجواء احتفالات المولد النبوى الشريف في ميدان السيد البدوي كانت تأسره منذ كان في الثامنة من عمره، أشكال العرائس والزينة والشوادر، ليقوده الشغف إلى تعلم صناعة العروسة والحصان على أصولها، ومن وقتها وهو يعشقها ويمارسها حتى بلغ الثالثة والسبعين من عمره، كما يحرص أبناؤه وأحفاده على صنع حلوى المولد الشعبية كعرف سنوي لا يغيب عن أجواء المولد.
رحلة صناعة العروسة الحلاوة
يروى ربيع عبدربه لـ«الوطن»: «تبدأ رحلة صناعة العروسة والحصان الحلاوة من مجسّمات خشبية، على الشكل نفسه المعتاد للعروسة، وتوضع المجسمات فى المياه 10 دقائق تقريباً، حتى يأخذ الخشب رطوبة، وفي الجانب الآخر نصنع الحلاوة، عبارة عن ميه وسكر وملح ليمون بنسويها على النار على درجة حرارة معينة، ونقلبها بالمضرب اليدوي لحد ما تاخد لون وقوام نقدر نصبه فى المجسم».
يُكمل صانع الحلوى بمحافظة الغربية حديثه بالشغف نفسه الذي بدأ به الصنعة، قائلاً: «لو عايزين نتقّل قوام العروسة بنسيب الحلاوة تبرد شوية، لو خفيفة بنصبها فى المجسم على طول، ونفس الحال بيكون مع الحصان، الخشب بيتنقع في الميه 5 أو 10 دقايق، وقوام العروسة مابيقعدش كتير برضه، بتستوى على طول، وتتحط على المجسم، ونستنى عليها في القالب تبرد شوية، وتاخد الطبعة ونفكها من القالب عشر دقائق أو ربع ساعة، لأن الخشب فيه نسبة رطوبة».
الحلاوة طول السنة في السيد البدوي
وعن المهنة التى ما زالت تسرى في دماء الرجل السبعينى، قال: «زمان كنت باقف في سوق الحلاوة أتفرج على الصنايعية لحد ما اتعلمت الشغلانة، ودلوقتى بعلمها لابني وهو بيعلم ابنه، وعندنا المصنع بس ماقدرش أروح، باعمل حاجات بسيطة، وأولادى بيعملوا أشكال تانية، زى أسد وقطة وسمك وسفينة وغيرها كتير، لكن أهم حاجة العروسة والحصان، لأنهم حلاوة زمان»، وأضاف «عم ربيع»: «في ميدان السيد البدوي الحلاوة موجودة طول السنة، لكن في مولد النبى الإقبال أكتر، ولو جه الموسم وماشتغلناش نزعل ونتعب».
