زوجة ريس زينة البحرين للسيسي: اعتبرهم مناورة.. إحنا مش عايزين فلوس عايزين نشوفهم

11:52 ص | الأربعاء 10 فبراير 2016

خيم الحزن والأسى على عائلة "ريس" مركب "زينة البحرين"، حسن العفيفي، والمفقودة في السودان، تجلس زوجته على سريرها متحضنة "كتاب الله"، ولم تكف عن البكاء والدعاء، وإلى جوارها بناتها الأربع، يحاولن طمأنتها على البحارة، في محاولة منهن للتخفيف عنها خبر العثور على جثمانين، نظرًا لحالتها الصحية.

"حسن ليس زوجي فحسب بل والدي وشقيقي وسندي وعكازي في الحياة، عمره ما تراجع عن مساعدة محتاج أو مريض، بارًا بعائلته، الصغير قبل الكبير، وكنا عايشين يوم بيومه، بهذه الكلمات وبعينين دامعتين بدأت زوجة الريس حسن حديثها.

وتابعة أميمة الزاهد، حديثها، قائلة "الفترة الأخيرة صرف كل ما نملكه على علاجي، مشيرة إلى أنها تلقت مكالمة من زوجها، في أثناء وجوده بالبرانيس قبل دخوله السودان، وأنه طمأنها على نفسه، وأوصاها بمتابعة الطبيب.

وأكدت "قال لي خلي بالك من نفسك ومن البنات، وربنا يعينّا عليكم"، وأوضحت أنه رغم إصابته بفيرس "سي" لم يتوان يومًا عن العمل، متابعة "لما كنت أقوله ريح نفسك يقولي ومين يصرف عليكم".

وأشارت الزاهد إلى أنها حينما علمت بخبر فقدان المركب، قالت "حسيت إن قلبي مقبوض، وقعدت أناجي الله لعودتهم سالمين"، وتابعت "حسن ده سندي ومفيش حد يعولنا غيره، طيب مع كل الناس، وعمره ما دخل قرش حرام علينا، ودائمًا يقول أنا عندي (ولايا) ربنا يسترهم، ولازم نمشي بما يرضي الله، عشان ربنا يكرمنا".

وناشدة الرئيس عبدالفتاح السيسي، "يا ريس دور عليهم عند الحدود الإريترية والسعودية، والجزر المحيطة"، مضيفة "من 14 يومًا نستغيث ومفيش حد بيسأل فينا، إحنا مش مستحملين البرد وهما في الميه وكل لحظة بتعجل بوفاتهم، اعتبرهم مناورة يا ريس، ولو حصل للبحارة شيء فذنبهم في رقابتك".

وقالت الأبنة الكبرى للريس حسن، ريهام ويبدو على وجهها الحزن، "لو المسؤولين بحثوا هيلاقوا البحارة مش عايزين منهم غير يتعبوا نفسهم شوية عشان البسطاء اللي زينا يعيشوا، إحنا 4 بنات، أبونا هو سندنا وضهرنا، لو السند راح من هيبقى لنا".

وأكدت "يا ريس نفسنا في خبر مفرح، تعبنا من كثر الانتظار كفاية عذاب بقى، وكل صياد هيحصله حاجة ذنبه في رقبة المسؤولين، لو أرسلوا لهم طائرة والصيادين شافوها هيشاورا لها وتنقذهم".

وتذكرت ريهام آخر مكالمة دارت بينها وبين والدها، قبل 18 يومًا قائلة، "قالي خلي بالك من نفسك يا حبيبتي مش هعرف أكلمك تاني، إحنا داخلين برانيس، ومش هيكون في شبكة".

وبعينين تملأهما الدموع، ولسان متلعثم، وجهت أميمة رسالة للرئيس عبدالفتاح السيسي، قائلة "إحنا مسؤولين منك يا ريس عايزين ولادنا، مش عايزين فلوس عايزين بس نشوفه، ويفضل فاتح علينا الباب مش كتير والله على بناته الغلابة".