ليه تشترى الفسيخ.. لما ممكن تعمليه فى البيت؟!

10:21 م | الأربعاء 21 مارس 2018

رائحته بدأت تنتشر فى الشوارع، يحبها الكثيرون على الرغم من قوتها، عندما ترتفع أسعار الفسيخ يبحثون عن طرق مختلفة لتوفيره بأقل سعر، ليكون وجبة أساسية على السفرة يوم شم النسيم، لجأت الكثير من السيدات لحيلة عمل الفسيخ فى المنزل، ليكون أقل تكلفة، وأكثر نظافة بحسب كلامهن، وهو ما لاحظه أكثر من «سمّاك» فقرروا المبادرة بعمله داخل محلاتهم.

لاحظ محمد صالحين، سمّاك بسوق سليمان جوهر فى الدقى، شراء سيدات للسمك البورى الذى يساوى سعر الكيلو منه 70 جنيهاً، وذلك من أجل عمل الفسيخ فى المنزل: «البورى سعره غالى شوية، لكن اللى بيعمله فسيخ فى البيت، بيوفّر كتير من إنه لو اشترى فسيخ من الفسخانى على طول».

{long_qoute_1}

تحكى النساء له وهن واقفات أمام دكانه، أن سعر الفسيخ وصل إلى 140 جنيهاً للكيلو، ويزيد إلى 150، وتطلب بعضهن منه «بورى» لعمله منزلياً: «الستات بتوفّر، لما ياخدوا اتنين كيلو بـ140 جنيه، ومعاهم إزازة زيت، و2 جنيه شطة، وكيسين ملح، يبقى أوفر من لو جابوه من فسخانى، ممكن يكلفهم فوق الـ260 جنيه».

للتسهيل على الزبائن والتوفير عليهم، يقوم «محمد» بعمل الفسيخ لزبائنه بحسب الطلب: «واحدة ما تعرفش تعمله فى البيت، تقوم شارية منّى السمك، وتجيب لى الملح والشطة والزيت، وأعمل لها الفسيخ عندى طالما جابت لى الحاجة، لو جيبت أنا الزيت والملح وخلافه ببيعه بـ110، ومش كل السماكين تعرف تعمل فسيخ». ممدوح عبدالله، فسخانى، يبيع الكيلو بـ150 جنيهاً، يحكى: «الحالة الاقتصادية للناس مأثّرة طبعاً، ده فى السوبرماركت متنضف لحمة صافى بيوصل لـ235 جنيه».

يبيع إسلام نجيب، سماك، كيلو البورى بـ65 جنيهاً، استغل اقتراب موسم شم النسيم، مع قلة المكسب، فى عمل الفسيخ لزبائنه: «قلت أجرب بما أن البورى ما فيهوش مكسب، ستات كتير تشترى بورى تعمله فسيخ فى البيت، وغيرهم يقولوا لى اعملهولى، ويجيبوا لى الزيت والملح والشطة، وأنا أعمله، أوفر من برة اللى وصل 150 جنيه، وعلى شم النسيم هيوصل 160». تحكى الكثير من النساء لـ«إسلام» عن تفضيلهن عمل الفسيخ منزلياً، بسبب ضمانة جودته: «يقولوا لى نعمله فى البيت أضمن». على الرغم من أن الكثير من صديقات نادية على، إخصائية اجتماعية بإحدى مدارس التجريبى اللغات، قررن عمل الفسيخ بمنازلهن، فإنها لم تلحق هذا العام: «ما لحقتش، الوقت جرى ولو عملت دلوقت مش هلحق على شم النسيم مع أن عمايله سهلة جداً، هجيب رنجة وخلاص، ده الفسيخ برة بـ150 ووصل 160 كمان».