الأصدقاء: «ممكن نيجى من آخر الدنيا عشان اللمة دى»

10:33 م | الجمعة 01 يونيو 2018

قبل رفع أذان المغرب بدقائق، يغلق كل منهم محل عمله، متجهاً إلى مقر تجمعهم السنوى، أمام أحد محال الخياطة، بشارع منظرة السكرة بمنطقة السيدة زينب، حيث بدأ فرش الطعام بشكل يومى على منضدة كبيرة تسع نحو 10 أفراد، اعتادوا التجمع سنوياً حول مائدتهم الخاصة. من الصباح الباكر يبدأ عم محمود فؤاد تحضيراته للإفطار، يذهب لشراء الخضار واللحوم، ويقوم بتسويتها بعد صلاة العصر على نار هادئة بواسطة بوتاجاز صغير، بينما يؤدى الأعمال المتأخرة داخل محله لحين حلول وقت الإفطار.

«كل سنة ببقى مسئول عن طبخ الأكل، الأصدقاء والجيران بيحبوا نفسى وطعم الأكل بتاعى وعشان أنا بعمله بحب واستمتاع بيطلع طعمه حلو»، يقولها عم محمود، الرجل السبعينى، أثناء تحضيره صينية الفول باللية والبطاطس المحمرة، الوجبة التى يتميز فى طبخها بين عدد من الأصناف: «كلهم أجمعوا امبارح على الفول باللية بعد ما عملت لهم صينية كوسة بالفراخ، عشان بعمله بطريقة خاصة، بحطله بهارات معينة وفحمة بيطلع طعمه خرافى وعمر ما حد اختلف على طعمه». وبينما يجلس الجميع لتناول الإفطار يكون محسن حامد، آخر من يتناول الطعام، مكتفياً بكسر صيامه بشرب بعض المياه والتمر، لتوليه مسئولية الإشراف على الإفطار وتلبية احتياجات الأصدقاء خلال تناولهم الطعام: «حاطين قواعد للمائدة بتاعتنا، كل واحد بيبقى مسئول عن حاجة يعملها، والفطار كل يوم بيبقى مسئولية كل واحد فينا حسب جدول متفق عليه، ميجليش نفس للأكل غير لما أشوف كلهم كلوا ومحدش ناقصه حاجة، ولو شفنا واحد ماشى فى الشارع بنقعده يفطر معانا، دا واجب وخير فى الشهر الكريم، الفطار عندنا مش مقتصر على شخص بعينه كل واحد بيساعد بحاجة حتى جيرانا اللى قصاد المحل بيبعتولنا أكل وحلو كل يوم». أسامة إبراهيم، صاحب محل خياطة، ينتظر اليوم الذى يذهب فيه أولاده للإفطار خارج المنزل بعد وفاة زوجته، للاستمتاع بالإفطار برفقة أصدقائه فى الشارع: «الواحد مبيحسش بلمة رمضان غير وسطهم، مراتى كانت بتشجعنى أروح أفطر معاهم عشان بتبقى عارفة إن دا بيبسطنى، حضرت المائدة دى من أيام ما كنا نعملها على الأرض ماكنش فيه طرابيزة، لكن بعد وفاتها بقى صعب أسيب أولادى يفطروا لوحدهم». ومن الهرم، يأتى أسامة بركات لمشاركة أصدقائه الإفطار، تاركاً والدته وشقيقته بمفردهما، للاستمتاع بلمة السمر التى تستمر حتى أذان العشاء: «ممكن آجى من آخر الدنيا عشان اللمة دى».