«الوطن» داخل محطات الخط الأول: التكييفات عطلانة حتى إشعار آخر
زحام فى الخط الأول للمترو
وقف «عم ثروت» على رصيف مترو الأنفاق فى موعده الثابت، الساعة تدق الثالثة عصراً، الزحام على أشده فى محطة «الشهداء» حيث تتضاعف حرارة الجو بفعل الزحام وقلة الأوكسجين تحت الأرض، صوت صفارة المحطة يُخبر الركاب بقدوم المترو، يتأهب «ثروت» لصعود عربة الرجال فور فتح الباب، ليصطدم بعدم وجود تكييفات تعمل فى ظل زحام الركاب داخل عربات قطارات المترو بالخط الأول «المرج - حلوان».
ويقول ثروت عتمان، البالغ من العمر 61 عاماً، وأحد ركاب مترو الأنفاق، إن المترو هو وسيلة مواصلاته الأسرع والأكثر أماناً من مختلف وسائل المواصلات فى مصر، وإنه حريص يومياً على أن يستقل قطارات المترو.
أحد الركاب: «لما قالوا هنزود التذكرة ماحدش اعترض عشان الخدمات تتحسن.. لكن كل حاجة زى ما هى».. والمتحدث الرسمى: بدأنا تنفيذ بعض خطط التطوير
ويسرد «عم ثروت» خلال حديثه لـ«الوطن»، داخل أحد قطارات الخط الأول للمترو، لحظات التعب والإرهاق أثناء العودة من عمله، قائلاً: «كل يوم باصحى الساعة 5 صباحاً أصلى وأستعد عشان أنزل أروح شغلى وبركب من محطة الملك الصالح الساعة 6 صباحاً وأصل شغلى فى وسط البلد الساعة 7 صباحاً، وأستمر فى عملى حتى الساعة الثالثة إلا الربع عصراً لألحق أركب القطار من محطة الشهداء علشان أرجع بيتى قبل الرابعة، ولكن التكييفات عطلانة وعربات القطارات كلها زحمة وحتى الخدمة المقدمة مش قد كده بعد زيادة سعر تذكرة المترو»، ويتابع العجوز «وأقول للمسئولين إننا معاكوا بس قدموا لينا خدمات مميزة، واحنا مش معترضين على زيادة أسعار التذاكر فى سبيل تقديم خدمة كويسة، ما هو المترو لو وقف وتعطل يبقى عليه العوض، والمفروض إن المسئولين يعملوا صيانة للتكييفات أولاً بأول علشان درجة الحرارة مرتفعة جداً وأعداد الركاب فى تزايد يومياً خاصة عند العودة من العمل، وممكن حد يحصله هبوط بسبب التكييفات العطلانة دى، ولما قالوا هنزود سعر التذكرة ماحدش اعترض علشان كنا عارفين إن الخدمات هتتحسن لكن للأسف كل حاجة زى ما هى».
وأثناء حديث «عم ثروت» تتدخل سيدة تدعى أمينة عبدالمعطى، تبلغ من العمر 65 عاماً، لتقول «إن مترو الأنفاق بيسهل علينا حاجات كتير، وبطالب وزير النقل إنه يعمل تطوير وتحديث فى عربات قطارات المترو عشان نحس إننا بنتعامل من قبل المسئولين بشكل محترم، وكمان لما سعر التذكرة زادت أنا قلت أكيد زادت علشان يبقى فيه تحديث فى عربات القطارات وتبقى كلها مكيفة ونضيفة، احنا ما فيش أحسن من بلدنا»، وتصمت «الست أمينة» لحظات وتعود لتقول «احنا بنمر بظروف صعبة علينا كلنا بس لازم نتحمل علشان دى بلدنا أم الدنيا، ولازم نقف ورا الرئيس عبدالفتاح السيسى فى كل خطوات الإصلاح وبعد كده هنبقى كويسين جداً، وبقول لكل شبابنا: انتوا لازم تقفوا مع بلدكم فى وقت صعب زى ده علشان ربنا دايماً بيحميها من كل أعدائها، وكمان المسئولين لازم يقوموا بواجبهم فى تنفيذ جميع خطط الإصلاح علشان احنا كشعب نحس بالتغيير».
العضو المنتدب للتشغيل والصيانة: الشركة تعمل على إجراء الصيانات وإصلاح تكييفات جميع القطارات
فى المقابل، قال المهندس خالد صبرة، العضو المنتدب للتشغيل والصيانة بمترو الأنفاق، إن الشركة تعمل على توفير كافة قطع غيار القطارات، وإجراء الصيانات اللازمة، والعمل على إصلاح جميع تكييفات القطارات، موضحاً أن هناك بعض الخدمات التى تقدم لجمهور الركاب المسافرين على جميع الخطوط الثلاثة، كما أن هناك إجراءات أمنية مشددة فى جميع المحطات لتوفير كافة الحماية الأمنية للركاب لحفظ أمنهم وسلامتهم.
ومن جهته، قال أحمد عبدالهادى، المتحدث الرسمى باسم شركة مترو الأنفاق، إن الشركة بدأت تنفيذ بعض خطط تطوير الخط الأول للمترو «المرج - حلوان»، مشيراً إلى أنه سيتم غلق محطة مترو المرج الجديدة اعتباراً من يوم 3 يوليو المقبل ولمدة 5 أشهر، وذلك استكمالاً لخطة التطوير التى بدأتها الشركة المصرية لإدارة وتشغيل مترو الأنفاق، فى النهوض بمستوى الخدمة المقدمة لجمهور الركاب وتخفيف المعاناة عن ركاب محطة «المرج الجديدة» نظراً لما تعانيه المحطة من تكدس شديد للركاب.