إيهاب يرسم لوحاته بـروج أمه وأخته: بجرب حاجة جديد

07:31 م | السبت 23 مارس 2019

بطريقة غير معتادة، قرر إيهاب الجزار، رسم لوحاته من خلال استخدام أحمر الشفاه بدرجاته المختلفة "الروج"، بدلًا من ألوان الزيت أو المياه، التي لم يناسب استخدامها سماكة أغلب كراسات الرسم التي يملكها، حاصلًا عليها من خلال أدوات تجميل والدته وشقيقته.

في وقت متأخر من المساء يفضل الشاب صاحب الـ20 عاما، ممارسة هوايته في الرسم، مكتشفًا عدم توافر ألوان مناسبة لطبيعة الورق الذي يرسم عليه والرسمة التي يحضر لها بين أدواته، محاولًا إيجاد بديل بجمع أقلام أحمر الشفاه بدرجاتها من المنزل: "كان الوقت متأخر ومافيش مكتبات فاتحة أجيب منها ألوان تناسب طبيعة ورق الكانسون، فقولت أجرب أقلام الروج، استخدمت حوالي 16 قلم تقريبا اللي كانوا موجودين في البيت في الرسمتين اللي رسمتهم".

بتحديد الرسمة بالرصاص يبدأ إيهاب، الذي يدرس في معهد حاسبات ومعلومات، بمحافظة المنوفية، ويعمل في التصوير منذ عامين، محددًا ملامحها باستخدام الدرجات مختلفة، محاولًا الاستعانة بمثبت مكياج للحفاظ على ثبات الرسمة وضياع ملامحها: "كنت خايف أن الرسمة تبوظ عشان الروج مش بينشف علي الورق، كنت بتعامل معاها بحذر لحد ما واحد شافها وعجبته واشتراها مني وعملها برواز خاص وحطها في الكافية بتاعه".

رد فعل عنيف لم يتوقعه إيهاب، من والدته وشقيقته في الصباح بعد اكتشافهما تهالك جميع أقلام الروج بالمنزل، الأمر الذي واجهه الشاب سريعًا بشراء عدد من الأقلام من ماله الخاص: "اشتريت ليهم وليا عشان لما أحب أرسم تاني، ومحدش يزعل مني في البيت، مع إني في الغالب برسم بالرصاص بس الروج حسيت إنه حاجة مختلفة".