السيسي: بصارح المصريين بكل كبيرة وصغيرة.. هتحاسب قدام ربنا
الرئيس السيسي
قال الرئيس عبدالفتاح السيسي إنّه يصارح الشعب المصري بكل كبيرة وصغيرة، حتى يسجلها الشعب المصري عليه، حال عدم وجوده في المستقبل وفشل أحد المشروعات، وخص بالذكر مشروع التأمين الصحي الشامل الجديد.
وأضاف السيسي خلال كلمته في افتتاح مشروعات قومية وتنموية بمحافظتي بورسعيد وشمال سيناء، بحضور عدد من الشخصيات المهمة وكبار رجال الدولة: "بقولكم كل حاجة عشان هتقولوا بعدين أطلقوا الموضوع من بورسعيد وقالوا هنفتح في 5 محافظات، وفي خلال الـ15 سنة هيغطوا مصر، وفاتوا الـ15 سنة ومغطوش مصر ونفشل زي ما فشلنا قبل كدا".
وتابع الرئيس: "هتقولولي إيه اللي إنت بتقوله ده إحنا جايين نحتفل، أنا عارف إنّ اللي بقوله يتنافى مع الإعلام والسياسة، أنا هتحاسب قدام ربنا على كل كلمة بقولها، ولو عاوزين اللي بنفتتحه النهارده ينجح، الدولة ملتزمة في الشق الخاص بيها، والـ8 مستشفيات اللي قولنا هنرفع كفاءتهم ونجهزهم رفعنا كفاءتهم وجهزناهم عشان نشوف نتائج التشغيل هتعمل إيه، ورفعنا كفاءة المراكز الطبية، والأموال المخصصة عشان العلاج هيتم تقديمها، والمشروع مش هينجح في مصر إلا إذا تحقق كل من بنى عليه المشروع".
وزاد السيسي: "خلال الـ40 عاما الماضية كل الأفكار والأسس لم تنجح، لأن الشق اللي الدولة بنت عليه فكرتها ومسار توصل فيه لنهايته لتحقيق الهدف من المشروع كان بيتعسر، وإحنا بننجح مع بعض ولبعض، وممكن شاب أو أسرة تقعد سنوات ومش محتاجة علاج، وفجأة حد يتعب يحتاج يصرفوا مئات الآلاف على العلاج، عشان كدا بندفع دلوقتي لأنه تكافلي، أنا بسجل ليكم والتاريخ كلامي ده، يا جماعة الفشل والنجاح إحنا اللي بنعملهم، الجزء الخاص بينا إحنا ملتزمين بيه، واللي هيروح ويقول مش معايا هيتصور على فيس بوك وهتلاقي حملات وهيتم إساءة للأمر قبل إطلاقه".
وأوضح الرئيس: "لازم في الأول سلبيات وهنتعامل معاها، ولازم كلنا في المستشفيات والمراكز، ساعدونا ندي رسالة حقيقية إننا دولة لو خططنا لأمر قادرين على إنجاحه".
ويفتتح الرئيس عبدالفتاح السيسي اليوم مشروعات قومية في محافظتي بورسعيد وشمال سيناء، بينها مستشفى النصر التخصصي للأطفال ضمن منظومة التأمين الصحي الشامل، كما يفتتح أنفاق بورسعيد، محور 30 يونيو، مبنى المركز اللوجيستي بجمارك بورسعيد الذي يمثل المدينة الرقمية لبورسعيد، ومصنعين للأسماك وزيت الطعام.
ويتضمن الافتتاح كلمة للدكتور مصطفى مدبولي رئيس مجلس الوزراء، والدكتور عمرو طلعت وزير الاتصالات وتكنولوجيا المعلومات، ووزيرة الصحة، يليها عرض فيلم تسجيلي عن المشروعات التي تمت خلال فترة رئاسة الرئيس عبدالفتاح السيسي، ثم عرض أوبريت "وش الخير" بمشاركة 500 طالب من مختلف مدارس بورسعيد.
ويتفقد الرئيس خلال جولته كذلك، مستشفى النصر التخصصي لأورام الأطفال التابع لمنظومة التأمين الصحي الشامل، ومشروع المزارع السمكية بشرق بورسعيد ومشروع تطهير بحيرة المنزلة، ويفتتح المرحلة الأولى من مشروع الأرصفة البحرية شرق بورسعيد بالفيديو كونفرانس.