سائقو التاكسي بالمحلة يطالبون بوقفة مع التوك توك: بيخطفوا الزباين

02:10 م | الاثنين 10 أغسطس 2020

شكى سائقو التاكسي في المحلة الكبرى بمحافظة الغربية، من مضايقات عديدة يتعرضون لها من سائقي "التوك توك"، وصلت إلى حد البلطجة وأخذ الزبائن بالقوة، ما دفعهم إلى الوقوف ليلاً في شارع البحر بالمحلة، ‏مطالبين بوضع قوانين تنظم مرور "التوك توك".‏

محمد لطفي، سائق شارك في إضراب زملائه، واصفاً ما يفعله سائقو التوك توك بسرقة أكل العيش، حيث تعرض للعديد من المواقف التي تستوجب وضع حداً لها: "مش عارفين ‏نشتغل من التوك توك، بيمشي معانا وجنبنا في نفس الأماكن اللي شغالين فيها، وبيزنق علينا وعاوز يركب الناس ‏اللي وقفت لينا ‏بالعافية، لو حد وقف بيشاور لي بيجرى عليه عشان ياخده ويركبه، وكنت واقف مستني الزباين جه ‏وقف جنب باب التاكسي عشان الزبون ما يعرفش يفتح الباب فايركب معاه، وبتيجي تتكلم بيبقى هاين عليه ‏يضربك وبيعلي صوته".‏

لا يمانع "لطفي" أن يعمل سائقو التوك توك، ولكن يطالب بتحديد أماكن معينة لهم، كالمناطق الداخلية في المدن، والأهم عدم التعدي ‏على رزق سائق التاكسي: "الشوارع الرئيسية ده شغلي، ماينفعش ييجي يقف فيها ويضيع عليا رزقي، أنا بادفع ‏إيجار شقة ومصاريف عيالي ده غير صيانة العربية والغاز، هنلاقيها من كورونا ولا من التوك توك، اللي بشتغل ‏بيه بحط بيه غاز وأروح أكني ماشتغلش".

ليست تلك المرة الأولى التي يضرب فيها سائقو التاكسي في المحلة بالإضراب احتجاجاً ‏على مضايقات التوك توك، ولكن دون جدوى، حسب عابدين أحمد، سائق، والذي وجد في أثناء قيامه بتوصل أحد الزبائن، العديد من سائقي التاكسي واقفين، وعندما علم أنه إضراب بسبب ممارسات سائقي التوك توك، انضم إليهم: "وصلت الزبون ووقفت معاهم، التوك توك ‏عاوز يركب الناس بالعافية،‏ ‏كل الشوارع الرئيسية في المحلة مليانة تكاتك، بياخد مننا الزباين ومش لاقيين حد، وعشان بيمشي عكس ‏الاتجاه وبيوصل الزبون أسرع، فالزبون بيستسهل ويركب معاه، ده غير أنه بيخبط فينا وبيزنق علينا، إحنا ‏عاوزين ناكل عيش".