لو متهورة وبتحبها اشترك لها.. جيم يقرب بين الأزواج بخصم 75%: الصلح خير
لو متهورة وبتحبها اشترك لها.. جيم يقرب بين الأزواج بخصم 75%: الصلح خير
"متهورة وبتحبها؟ صالحها أنت كمان وهاتلها اشتراك في الجيم بخصم في السنة 75%.. قوموا اتصالحوا الصلح خير"، عرض مغري قدمته إحدى الصالات اللياقة البدنية "الجيم"، داخل فرعيه بالقاهرة والجيزة، مستغلا تريند جديد متداول على "فيسبوك"، بعد حل الخلاف بين الفنان تامر حسني وزوجته بسمة بوسيل، والصلح بينهما.
شهدت الفترة الأخيرة، بعض الأزمات والخلافات الأسرية بين المطرب تامر حسني وزوجته المطربة المغربية بسمة بوسيل، بعد نشر الأخيرة حالة على "انستجرام" تعلن فيه انفصالها عنه، وبعد يومين من الجدل أعلن الثنائي تصالحهما، وكتب لها حسني: "متهورة بس بحبك"، وهي الجملة التي أصبحت تريند، بعدما تداولها الجمهور بقوة، مباركين إنهاء المشكلة وعودتهما إلى عش الزوجية مجددا.
واستغل "الجيم" التريند، إذ حرصت سارة عادل مسئولة المبيعات والحجوزات، على توطيد العلاقة بين الأزواج والمخطوبين، من خلال تقديم عرض تخفيض كبير يصل إلى 75%.
تقول: "اللي بيحب بيسامح وبيفاجئ، والجيم قدم مفاجأته عشان كل واحد يقدر يسعد خطيبته أو مراته، ويفرحها ويساعدها تعمل الفورمة اللي عايزها باشتراك لمدة سنة كاملة، وده الهدف من العرض بتاعنا"، مشيرة إلى أن إدارة الجيم تهتم بالتريندات والقضايا الهامة التي تحدث على السوشيال ميديا، وتشغل بال الرواد.
"الجيم عمل الخصم عشان نخلي الناس تستفاد، وفي نفس الوقت إحنا كمان نستفاد، ونسبة الإقبال تزيد، وده اللي حصل بالفعل"، بحسب "سارة"، موضحة أن قيمة الاشتراك السنوي في العرض تصل إلى 2600 جنيه بدلا من 7100 جنيه.
وتؤكد سارة: "الخصم كبير جدا ومستمر لمدة أسبوع، عشان يقدر يتشجع ويشترك عدد كبير، وهي فرصة كويسة جدا، أن أي حد يصالح مراته باشتراك الجيم اللي نفسها فيه، بس مكنتش بتشترك عشان سعره غالي، ودلوقتي سعره كويس جدا، وكمان في متابعات دورية ونظام غذائي ومدربات موجودين باستمرار عشان تتابع المشتركين".
ولم تكن هذه المرة الأولى التي يقدم فيها "الجيم"، خصومات وعروض تخفيض مستغلا التريندات على "فيسبوك": "أي حاجة بتحصل إحنا بنحاول نقلبها إلى خصومات ونفرح بها مستخدمين السوشيال ميديا"، ووفقا لـ"سارة"، هناك إقبالا كبيرا من الأزواج الذين يشتركون في العرض كمفاجأة لزوجاتهم.
