معرض ملابس مجاناً للفقراء في طرة
معرض ملابس مجانا لفقراء «طرة»، قرار اتّخذه أحمد عبد السلام، داخل أحد دور المناسبات الاجتماعية مراعاة لظروف المواطنين، في ظل ارتفاع الأسعار، من خلال تنظيم معرض للأهالي، رافعا شعار «خُد اللي يناسبك خلينا نفرح».
وقدم «أحمد» ملابسا تناسبا جميع الأعمار، وعرضها لغير القادرين: «الهدوم كلها جديدة، ومفيش عيب في أي قطعة، كأنهم بيشتروها من أحسن محل، دي أمانة وعهد قطعته على نفسي».
افتتح «أحمد» المعرض، بعد ملاحظة الإقبال المحدود من أهالي المنطقة على الشراء: «في المواسم، كان الناس بيشتروا من بدري، ويدفعوا أسعار على القد، على عكس دلوقتي، فقررت أسهل على الناس الدنيا وأفرّحهم بالعيد»، حيث تفتح أبواب المعرض أمام كل المواطنين من بعد الظهيرة، وحتى 11 مساءً: «الإقبال من الناس كويس جدا وبياخدوا كل اللي محتاجينه، وكل واحد عارف مقاسه عشان مفيش مكان يقيسوا فيه وطبعا كان في نظام وتباعد اجتماعي وحرصنا أننا نعقم المكان».
«الناس كانوا مكسوفين في الأول ياخدوا هدوم ليهم وعيالهم، لحد ما بقيت آخدهم بنفسي، وأفرّجهم على الهدوم، وآخد رأيهم في الحاجة اللي عاجباهم»، يقولها «أحمد»، الذي فوجئ بالإقبال الكبير للمواطنين بعد مرور عدة أيام من افتتاح المعرض: «الناس اتبسطت جدا من التجربة، وهاكررها دايما في المواسم والأعياد، علشان أفرّح كل الناس وابنسطهم ولو بحاجة بسيطة في الأيام دي».
ويقول «أحمد»، إن هذه المبادرة أسسها مع بعض المتطوعين داخل المنطقة: «لما اقترحت عليهم فكرة أننا نعمل معرض للناس الغلابة اللي حوالينا والمتطوعين كلهم وافقوا وبدأنا نجمع هدوم من الأسر اللي قادرة تستغنى عن هدومها وفي نفس الوقت تكون بحالتها كويس وبتتغسل وتتعرض في المعرض وباقي الهدوم بنشتريها من الوكالة ونبقى حريصين تكون كويسة جدا».
تعليقات الفيسبوك