حديقة الحيوانات الأليفة
أثار مقطع فيديو منشور على موقع التواصل الاجتماعي «فيسبوك»، استياء الكثيرين، حيث أظهر أطفالا داخل حديقة الحيوان يركضون وراء بعض الحيوانات ويهاجمونها.
وانتشر مقطع الفيديو من حساب الدكتور البيطري أحمد النبراوي الذي التقطه بنفسه، وعلق عليه قائلا: «في حديقة الحيوان في الجيزة عاملين حاجه اسمها petting zoo سايبين الناس تدخل على الحيوانات عشان تأكلهم، بس في الواقع العيال وأهاليهم بيجروا ورا الحيوانات يضربوهم بشلاليت و مفيش أي حارس أو موظف من الجنينة يوقف أو يمنع هذه المهزلة».
وتواصلنا مع صاحب الفيديو، الطبيب أحمد النبراوي الذي شرح أنه كان في زيارة مع عائلته لحديقة الحيوان وتفاجئ بجزء في الحديقة مفتوحة للزائرين للتواصل مع الحيوانات: «أقفاص فيها اللاما ومعيز وفراخ وسلاحف وغيره، اليوم، اللي روحته كان زحمة الناس بتضربهم بالشلاليت الكبار كمان مش الأطفال ويضربوهم وفي واحد كبير قعد يضربهم حتى السلحفاة مارحمهاش والمكان مفيهوش حراس على الأقفاص».
ورد المهندس هادي إمبابي المسؤول عن حديقة الحيوانات الأليفة أو petting zoo عن هذا الفيديو، قائلا: «شوفنا الفيديو المتداول، وإحنا دايما بندي الناس توعية عشان لا يصدر منهم سلوك غير لائق بالحيوان وأهم حاجة عندنا الرفق بالحيوان، واللي حصل إحنا تدركنا ولما شوفنا ده الناس دي خرجت بره وفاهمناها أن دول حيوانات أليفة ومينفعش نتعامل معاها كده».
وشرح هادي، أن حديقة الحيوانات الأليفة الموجودة داخل حديقة الحيوان: «معمولة للتعليم عشان الناس تحتكك بشكل مباشر بالحيوانات وده مطلب من مطالب الاتحاد الأفريقي، والفكرة بشكل عام من أنجح المشروعات اللي اتعملت في الحديقة كل الناس اللي جات عجبها الفكرة وعليها إقبال كبير ودي معمولة في العالم كله».
وأضاف المسؤول عن حديقة الحيوانات الأليفة، أنه أجرى تصميما جديدا في هذه المنطقة تشبه للغابة: «الناس سعيدة أوي والناس بيحسوا أنهم في سفاري»، وذكر هادي مرة أخرى أن الفيديو المنشور على موقع فيسبوك لم يتجاوز الـ 20 ثانية: «وإحنا تدركنا ده سريعا ومنعنا الأطفال فوق الـ10 سنين، وفي حارس في كل مكان وبندي الناس توعية دايما والشخص اللي حط الفيديو هو نفسه حط الصورة معاهم ومبسوط فمش عايزين نظلم الفكرة».
فيما ذكر الدكتور محمد رجائي، رئيس الإدارة المركزية لحديقة الحيوان، لـ«الوطن» أنه لم ير هذا االفيديو وأن هذه الحديقة لها دور تعليمي وتعد من الميزات الموجودة في حديقة الحيوان، وكان مطلبا لاستمرار العضوية في الاتحاد الأفريقي: «دي تعتبر من الإنجازات اللي اتعملت واسمها حديقة الحيوانات الأليفة وليها دور تعليمي».
وجاءت التعليقات على الفيديو بين انتقاد سلوكيات الأشخاص، وآراء ناس عن زيارتهم لـ petting zoo بـ«الواحد عايز يقول كلام عيب والله»، و«أنا كنت هناك من أسبوعين مفيش الكلام ده، بالعكس، كان في واحد واقف وبيدخل الناس بالدور وبيأكلوه ويتصوروا ويطلع».
تعليقات الفيسبوك