مسابقة لأجمل لوك: انتي أحلى في البيت

11:00 م | السبت 23 مايو 2020

استعراض الملابس الجديدة مع الأقارب والأصدقاء فى أول أيام العيد طقس احتفالى غاب هذا العام بسبب فيروس كورونا، ولكن مروة تاج حرصت على استمراره «أون لاين»، من خلال مسابقة ترفيهية للأمهات تدعوهن إلى التقاط صور مبهجة مع أبنائهن بملابس العيد. «المسابقة هدفها إننا نحس بفرحة العيد، حتى لو فيه أزمة صحية زى انتشار فيروس كورونا، وهى تحت عنوان أحلى لوك للعيد لنا ولولادنا، وهدفها الأساسى تقديم الدعم النفسى للأمهات، وتشجيعهم على عدم النزول من البيت، أو الاختلاط بالغير، لأنه ممكن يتسبب فى ضرر ليهم ولعائلاتهم لو لا قدر الله خالطوا حد مصاب بالفيروس» كلمات مروة حول فكرة المسابقة التى شارك فيها الآلاف.

تعتمد المسابقة، بحسب «مروة»، على التقاط الأمهات صوراً لأنفسهن أو لأبنائهن فى البيت، ويتم التصويت على أجمل صورة من قبل المشتركات، والفائزة تحصل على هدية: «التصوير لازم يكون فى البيت، ومش لازم لبس جديد، لأن فيه ستات كتير مقدرتش تنزل تشترى لبس لأبنائها خوفاً من الإصابة بالفيروس، فممكن الاعتماد على لبس خروج، أو لبس البيت حتى، وده برضه مراعاة للظروف الاقتصادية اللى الأسر المصرية بتمر بيها».

وضعت «مروة» شروطاً بسيطة للمسابقة، وهى أن تكون بعد أداء صلاة العيد وتناول الإفطار، فيتم نشر الصور على صفحة «الجروب»: «إحنا فى الجروب بنحاول نزرع الثقة فى نفوس الأمهات، ونساعدهم على أداء دورهم بأفضل شكل ممكن، فمثلاً خلال شهر رمضان، عملنا مسابقة إن الستات تساعد بعضها فى تنسيق لبس العيد لأولادهم، وأفضل 5 سيدات خدوا جوايز على ذوقهم الفنى العالى، وصحيح العيد ده مختلف، بس ده ميمنعش إننا نفرح بيه، ونفرح ولادنا، حتى لو قاعدين فى البيت، لأن العيد هدية من ربنا لينا لازم نقدرها».