صاحب المحل
"جمعتكم بيضاء اشتري الفراخ بخصومات تبدأ من 30% والتوصيل مجاني"، بهذه الطريقة شارك محسن عادل، صاحب محل دواجن بمنطقة جسر السويس، في احتفالات اليوم السنوي للجمعة البيضاء، بتقديم عروض تخفيض كبيرة على الدواجن.
لأول مرة يشارك "عادل"، في الاحتفال بالجمعة البيضاء: "لقيت كل المحلات حواليا بتحتفل وعاملة تخفيضات، قولت جات على الفراخ، وأهو منها الزباين تستفاد وأنا كمان هستفاد والبيع هيبقى كتير في اليوم ده"، وعروض التخفيض التي يقدمها تستمر لمدة يومين فقط، وهذه العروض يعلن عنها على صفحته الخاصة على موقع التواصل الاجتماعي فيسبوك، ووجد تفاعلاً كبيراً بين المستخدمين: "كل الزباين سألتني على العروض، وفي اللي بيحجز بالتليفون وبوصل له الفراخ مجاناً وفي الزباين اللي بتحب تنزل وتعاين وتشتري بنفسها".
بأسعار تتراوح بين 15 و27 جنيها، يبيع "عادل" الفراخ بأنواعها ويصل كيلو الفراخ الأبيض لـ 15 جنيها بدلاً من 21 جنيها، والفراخ البلدي بـ 27 جنيها للكيلو، أما لحم الأمهات الأبيض بـ 10 جنيهات، ويبع الفراخ الساسو بـ 20 جنيها بدلاً من 27 جنيها، ويقدم أيضاً "عادل" أطباق بوز الكيلو للكبدة والكلاوي، أما الحمام والبط والأرانب، فيقوم ببيعها على حسب طلب الزبائن.
وأضاف: "الزباين متعودة مني على الخصومات اللي بعملها كل فترة ولكن دي المرة الأولى اللي بشارك في الجمعة البيضاء، وعمري ما سمعت عنها غير من فترة قريبة لما لقيت إن أعداد كبيرة مستنيها عشان تشتري وبتبقى محوشة فلوس لها فقررت أشارك واكسب أنا كمان".
ووفقاً لـ "عادل"، فقد وجد إقبالاً كبيراً من الزبائن، والذين اشتروا كميات كبيرة من الفراخ بأنواعها المختلفة: "الإقبال النهارده زي ما بيقولوا تاريخي، ومش ملاحقين على الزباين من أول اليوم ولحد بكرة كمان، وفي زباين كتير جات تشتري وتخزن عندها وأخدت لقرايبها كمان، وبعد اللي حصل ده هشارك كل سنة في الجمعة البيضاء وربنا يوسع رزقي أنا واللي زيي".
تعليقات الفيسبوك