بائع حلاوة وعرائس المولد
«ادخل الشارع هتلاقي الحلو كله، على شمالك الحلاوة، وعلى يمينك العرايس والأحصنة طول ما انت ماشي، ولما ترجع ابقي دوّقني حتة»، كلمات يداعب بها «عم محمود» المارة، فيجلس على ناصية شارع «بين الحارات» بمنطقة وسط البلد، يتغني بحلوى المولد النبوي الشريف، وجمال الشارع الأشهر في تجارة «الحلاوة».
على كرسي خشبي، أمام أحد مصانع الحلوى بشارع «بين الحارات»، يجلس الحاج «محمد أمرو»، أحد العاملين بالمصنع، ممسكاً بسبحة خرزية، يحكي لـ«الوطن» خصوصية الشارع، ويصفه بـ«معقل الحلاوة»، حيث يزخر بمصانع إنتاجها، ومحال البيع بنظامي الجملة والقطاعي: «أول ما يبدأ موسم المولد، كل الشارع بيقلب نشاطه التجاري ويفرش حلاوة، حتي لو جزار، بييجي في الموسم ويفرش حلاوة، وبعد الموسم يرجع يمارس نشاطه الأساسي تاني».
يروي أمجد عزوز، مسئول بالمصنع ذاته، عن ظروف الموسم الجديد في ظل «كورونا»: «الموسم كان المفروض يمتد لشهرين ونصف، لكن من بعد ظروف كورونا الموسم ما بيكملش 50 يوم، تجهيز وتصنيع وتشطيب، المصنع بيوزع على تجار الجملة، وفي آخر 15 يوم من الموسم بنفرش قطاعي».
ولفت «أمجد» إلي الفئة الأكثر إقبالاً على المصنع: «إحنا بنغطي احتياجات المناطق الشعبية ووجه قبلي، بيجيلنا تجار من الصعيد يتفقوا معانا على كميات ويدفعوا عربون، إحنا بنقدر نصنع 56 صنف، من بينها أشهر الأصناف اللي شغالة في السوق، اللي هي السمسمية والفولية والحمصية والملبن، والعلب الجاهزة كيلو واتنين وتلاتة، ودي سعرها في المتناول جداً».
على بعد أمتار قليلة، يقف محمود حنفي، في أحد المحال التجارية بنفس الشارع، أمامه طاولة تغمرها أنواع وألوان الحلوى التي تجذب الأنظار: «إحنا أصلاً محل لعب أطفال، بس لازم نفرش حلاوة المولد في الموسم، المصانع هنا بتعتمد بشكل أساسي على الحلاوة العلف، زي الحمصية والسمسمية والفولية، يعني لو المصنع ناجح في تصنيعها، يبقي باقي الأنواع الجديدة عنده حلوة ومسحوبة، زي القشطة والبورم والبسيمة والنوجات، والأسعار بتبدأ من 45 جنيه للكيلو المشكل اللوكس، وكيلو الحلاوة بالمكسرات بـ65 جنيه، زي البسيمة بالبندق، والملبن باللوز، وقشطة بالزبيب».
وفي الشارع نفسه، يستقر «أبوحمزة»، المختص بتصنيع «حصان المولد» القماش، يحكي تفصيلياً عن طريقة تصنيعه: «بنبدأ شغل قبل المولد بـ20 يوم، الحصان الواحد بياخد ربع ساعة، برسم رسمة الحصان أو الجمل، وابعته للخياطة تقصه وتجمعه وتخيطه، وبعد ما ييجي من عند الخياطة بنحشيه نشارة، وبعد كدا بيدخل تشطيب، الرسام بيرسمله العينين والملامح ونحط علىه خرز وترتر، أما الأسعار عندي بتبدأ من 25 جنيه لأصغر حصان، والوسط بـ45 جنيه، والكبير بـ55 جنيه».
تعليقات الفيسبوك