انفراد| «الوطن» تنشر الحلقة السادسة من نص تحقيقات جريمة المنشار بالإسماعيلية: «جزء من الجثة تحت السرير»
انفراد| «الوطن» تنشر الحلقة السادسة من نص تحقيقات جريمة المنشار بالإسماعيلية: «جزء من الجثة تحت السرير»
- جريمة المنشار بالاسماعيلية
- التحقيقات في جريمة المنشار بالاسماعيلية
- تحقيقات جريمة المنشار بالاسماعيلية
- ضحية جريمة المنشار بالاسماعيلية
- نصوص التحقيقات في جريمة المنشار بالاسماعيلية
«ماشوفتش ابني؟، صحابه بيقولوا كان مع يوسف ابنك أول امبارح».. مشهد قد يبدو بسيطًا أمام قسم شرطة بالإسماعيلية، يوجه فيه والد الضحية، سؤالا بريئا إلى والد المتهم عن إنهاء حياة نجله في جريمة الإسماعيلية؛ ورغم اكتشاف الأخير جزء من جثة المجني عليه أسفل السرير، إلا أنه قرر أن يترك المنزل لنجله «المتهم» يكمل جريمته وإخفاء الجثة، ونفى للأب المكلوم معرفته بأي معلومة عن فلذة كبده.
التحقيقات في جريمة الإسماعيلية مع والد المتهم كشفت أنه كان على علم بالجريمة كاملة، قبل أن يتمكن نجله من التخلص من باقي الجثمان وتقطيعه إلى أشلاء وإلقائها في منطقة زراعية قرب مول شهير.. وإلي نص التحقيقات.
والد المتهم في جريمة الإسماعيلية: «جسمي قشعر لما لمست الجثة»
س- هل كان من المعتاد أن يصطحب نجلك زملاءه إلى المنزل؟
ج- لا وأنا كنت مانع الموضوع ده ولما شقيقته أبلغتني بوجوده يوم الواقعة استغربت.
س- ماذا بدر منك آنذاك؟
ج- كلمت يوسف على طول وأول مارة ماردش عليا ورد عليا في المرة الثانية، وقال إنه واخد صاحبه ونزل خلاص وبعدين اتصل بيا بعدها طلب مني مطهر لأنه مجروح في إيده، وقالي إن واحد صاحبه كان ذابح، وهو كان واقف معاه وكان بيهزر بالسكينة وخبطها في الأرض وردت فيه عورته.
س- ما الحالة التي كان عليها نجلك فور وصولك المنزل؟
ج- وشه كان أصفر ولونه مخطوف وكان فيه جرح في إيده اليمين ووضعت له عليها مطهر، ولما سألته إن الجرح مش للسبب اللي قاله وهل كان فيه خناقة بينه وبين حد رد عليا وفضل يحلف لي وبعدين ربط له الجرح واديته حقنة مسكنة.
س- ما الذي حدث بعد ذلك؟
ج- رحت عملت أكل في المطبخ ولقيت عليها لون غامق وشكيت يكون طينة بدم وقال إن الناس غسلوا هدومه لكن مانضتفش من الدم بعد الذبيحة وأنه لما رجع غسلها وهي اللي بهدلت السجادة، بعدها اتعشينا وكل واحد دخل ينام وبعدين سمعت صوت رقية بتنادي لي.
والد المتهم يكتشف الجثة
س- مالذي شاهدته فور دخولك غرفة نجلتك؟
ج- أول مادخلت بنتي قالت لي إن فيه شيء أسفل السرير مش عارفة هي إيه ورحت أشوف لقيت شنطة يوسف وحسيت إن فيه حاجة جنب الشنطة حطيت إيدي عليها جسمي قشعر وخوفت ويوسف مسك إيدي وقالي تعالى هقولك ده إيه.
س- ما مضمون الحوار الذي دار بينكما؟
ج- قالي ان كان فيه واحد صاحبه بيهزر مع صاحب أخوه وهو عنده في البيت وخبطه بخشبة وأغمي عليه، ونزل راح البيت إلا أنه لما نزل يجيب حاجة من الشارع قابله وقاله عايز أخبي ده عندك وهاخده منك 6 الصبح وكانوا في كيسين بلاستيك ولما رفض أنه ياخدهم منه هدده إن بصماته عليهم وهيتسجن معاهم.
س- وبماذا رددت عليه؟
ج- قلت يضمن منين أنه هيجي ومايكونش بيورطك قالي أكيد هيجي وقلت له أنت حر اعمل اللي عايزه وأنا ماليش دعوة بالموضوع ده وأول ماياخد حاجته مش عايز أشوف وشك في البيت عشان اللي أنت عملته مايرضيش ربنا وكان لازم تبلغوا الإسعاف أو الشرطة.
س- ماذا حدث بعد ذلك؟
ج- نزلت الصبح مع أول النهار وديت الولاد للمدرسة وبعدها رحت الورشة أفكر يوسف هيعمل إيه وبعدها اتصل بيا قالي إنه تخلص من الجثمان وصاحبه أخد الباقي وأنا قلت امشي من البيت زي ماقلت لك رد وقالي لما ترجع نتكلم في الموضوع ده.
س- ماذا حدث بعد ذلك؟
ج- أنا رحت بيت أخويا وبعدها جالي اتصال من المباحث سألوني عن هويتي ومكان شغلي وبعدها طلبوا يروحو البيت ليوسف سألوه عن صاحبه وبعدها تحركوا شوية في الشوارع بجوار البيت وبعدها اصطحبوه لمركز الشرطة.
س- من أين تحصل نجلك على معدات القتل؟
ج- بالنسبة للصاروخ ماعرفش لكن المكواه موجودة في البيت والسكاكين في المطبخ وكنت تركت شاكوش في المنزل احتياطي ﻷي أعمال تخص المنزل لاني أعمل نجار.
س- ما سبب قيام نجلك بشراء أكياس قمامة؟
ج- إحنا متعودين نشتري أكياس قمامة دايماً.
س- هل تقوم بمتابعة مايقوم نجلك بمشاهدته علي مواقع التواصل الاجتماعي؟
ج- هو مابيتفرجش على التلفزيون دايما قاعد على الموبايل وبيتفرج على أفلام أجنبية بس دايما لما كنت أقرب منه وهو ماسك الموبايل يخبيه ويقولي إن دي خصوصيته.
انتظروا في الحلقة السابعة: كيف كانت شقيقة المتهم أول من اكتشف الجريمة
شاهد في الحلقة الأولي: انفراد | «الوطن» تنشر الحلقة الأولى من نص تحقيقات جريمة المنشار في الإسماعيلية.. سرق تليفونه واشترى سجائر
شاهد في الحلقة الثانية: انفراد| «الوطن» تنشر الحلقة الثانية من تحقيقات جريمة المنشار بالإسماعيلية: توسَّل إليَّ قبل قتله
شاهد في الحلقة الثالثة.. «الوطن» تنشر الحلقة الثالثة من اعترافات المتهم بـ«جريمة المنشار»: أخفيت رأس الضحية أسفل السرير
شاهد في الحلقة الرابعة: انفراد| «الوطن» تنشر الحلقة الرابعة من تحقيقات جريمة المنشار بالإسماعيلية: Chat GPT قال للمتهم «حرام عليك»
شاهد في الحلقة الخامسة من تحقيقات جريمة المنشار بالإسماعيلية: «أبويا قال لي كمل مصيبتك لوحدك»
