أبوذكري: كان بيوصلني كل يوم راجل شكل.. وبابا قالي طظ في كلام الناس
أبو ذكري: من غيرها عمري ما كنت هبقى لا مخرجة ولا أي حاجة
كاملة أبو ذكري
تحدثت المخرجة كاملة أبو ذكري، عن حياتها الأسرية بجانب عملها في مهنة غير نمطية مثل الإخراج، قائلة: «أول لما اشتغلت مساعدة، كان عدد ساعات العمل حوالي 20 ساعة، فممكن كنت أنزل الساعة 6 بعد العصر وأرجع الساعة 4 أو 5 الصبح أو أنزل 10 الصبح وأرجع الساعة 2 بالليل، وكنت لسة مش بسوق علشان عندي 16 سنة».
وأضافت «أبو ذكري»، خلال لقاء ببرنامج «معكم منى الشاذلي»، المذاع على شاشة قناة «cbc»، وتقدمه الإعلامية منى الشاذلي، «كان ممكن حد من اللوكيشن هو اللي بيروحني، زي مساعد المخرج أو مساعد المصور أو مدير الإنتاج، فأنا بالنسبة للشارع بنزل كل يوم وبرجع مع راجل شكل يروحني، فابتديت أحس بنظرات الناس مش مريحاني، فاتضايقت وقولت لبابا شكلي مش هكمل، فقالي اللي في الشارع يهموكي في إيه؟ أنتي لو كنتي بتشتغلي دكتورة كنتي بردوه هترجعي متأخر وزميل ليكي بيروحك.. طظ في أي حد وميهمكيش حاجة وأول لما تميت 18 سنة جبت عربية وأنقذت نفسي بس بقيت أوصلهم معايا».
وتابعت: «الحياة مكنتش صعبة بسبب أمي، ومن غيرها عمري ما كنت هبقى لا مخرجة ولا أي حاجة، لأن عمري ما كنت هسيب بنتي تتربى مع دادا أو حد غريب، لكن أمي ربت بنتي أحسن مني، وخلتني أقدر أشتغل وأسافر مهرجانات وأنا مطمنة على بنتي، ولما توفت كانت بنتي عندها 18 سنة، فكأنها وصلتني لبر الأمان».
كانت كاملة أبو ذكري، أخرجت مسلسل «بـ100 وش»، بطولة نيللي كريم وآسر ياسين، إسلام إبراهيم، زينب غريب، وتم عرضه في السباق الرمضاني الماضي.