كلاب تتجمع فوق سيارة مواطن
في أحد الشوارع، تجلس مجموعة من الكلاب فوق سيارة، من اللون الرصاصي، بجوار بعضها، بهدف تبادل التدفئة في أجواء الشتاء الباردة، مشهد وثقه المرشد السياحي أحمد شريف، ونشره عبر حسابه على موقع التواصل الاجتماعي «فيسبوك»، لتنال الصورة تعاطف الجميع.
حكى المرشد السياحي، قصة الكلاب، وسبب نومها على هذه السيارة، موضحا: «صاحب العربية ديه بيقول إن الكلاب ديه فى منطقته، وحريص على أنه يأكلهم، وياخد باله منهم، هما عارفين عربيته كويس، وفى يوم نزل الصبح عشان يروح شغله بالعربية، فوجئ بالكلاب نايمين فوق عربيته بالشكل ده».
أضاف «شريف»، أن الطقس في هذا اليوم سيئا وممطرا، موضحا سبب اختيار الكلاب لهذه العربية: «صاحب العربية بيقول، الجو كان برد جدا وممطر والشوارع متغرقة، ومن وسط كل العربيات اللي فى الشارع، إختاروا عربيتى، وكأنهم عارفين إنى مش هعترض وهرحب بيهم جدا، واليوم ده مرضاش يصحيهم، وراح شغله مواصلات، وكان على قلبه زى العسل».
ووصف المرشد السياحي، موقف الكلاب، بأنه بمثابة رد الجميل لصاحب العربية: «الكلاب بتاخد بالها من عربيته، وأكتر من مره حد يبقى معدى من جنب العربية، والكلاب تنبح عليه، حماية من الدرجة الأولى، وكأنهم بيقولوله نام أنت وارتاح وعربيتك فى عنينا».
نالت الصور التي نشرها المرشد السياحي، إعجاب كثير من الأشخاص على مواقع التواصل الاجتماعي، إذ جاءت التعليقات، مثل «أجمل شيء بالكون الإنسانية»، و«كن لطيفا رحيما مع كل شيء يتنفس» و«ربنا يباركلك في كل حاجة»، و«كل التحية لك ولهم، إخلاصهم ورقي مشاعرك عمله نادرة».
تعليقات الفيسبوك