«بابا فيه ريحة وحشة أوي في الأوضة ومش عارفة أنام منها»، كانت هذه الكلمات أول خيوط لاكتشاف جريمة الإسماعيلية المعروفة إعلاميًا باسم جريمة المنشار والتي راح ضحيتها طفل عمره 13 عامًا، قالتها شقيقة المتهم، إلا أن والدها رغم اكتشافه للجريمة لم يبلغ الشرطة بالواقعة وقرر أن يترك المنزل قائلاً لنجله: «كمل مصيبتك لوحدك» بحسب تحقيقات النيابة.

وبحسب أقوال أشقاء المتهم بجريمة الإسماعيلية فإن شقيقهم فور سماعه صراخهم قرر صرفهما من المنزل إلى أن عاد والدهما من عمله.. وإلى نص التحقيقات.

شقيقة المتهم بارتكاب جريمة الإسماعيلية: «لم أستطع النوم بسبب رائحة الدم»

س- ما طبيعة علاقتك بالمتهم يوسف؟

ج- يوسف أخويا الكبير وعلاقتي بيه مش حلوة ﻷنه على طول كان بيضربني لإني كنت بقول لبابا علي أي شيء بيعمله غلط.

س- ما سبب مغادرة شقيقك للمسكن؟

ج- لإن أول ما دخلنا شمينا ريحة وحشة زي اللحم النيء وكانت جاية من ناحية الحمام.

س- هل وقفتي على سبب هذه الرائحة؟

ج- أنا ماعرفش بس لقيت دم علي الأرض والسجادة والثلاجة ودول اللي كانوا في الصالة.

س- ما هي الحالة التي كانت عليها شقيقك المتهم آنذاك؟

ج- كان شايل في إيده كيس أسود بلاستيك وكان لابس في إيده الاتنين جوانتي طبي أزرق اللون بس كانت كف إيده اليمين متعورة.

س-ماذا حدث بعد ذلك؟

ج- أنا طلعت من البيت أنا وأخويا وتوجهت إلي كشك عند البيت بيشحن رصيد وكلمت بابا وقلت له يوسف معاه واحد في البيت والولد عمال يصوت ويقول الحقوني وبابا قال هيكلمه وبعدها أنا خوفت ارجع البيت تاني بسبب الأصوات اللي سمعتها ورحت عند بيت واحدة صاحبتي.

س- متي عاد والدك إلى المنزل؟

ج- كانت حوالي الساعة 9 مساء وبابا شاف دم علي الثلاجة وعلي الكرسي اللي في الصالة وقالي مامسحتهمش ليه قلت له أنا قرفانة من ريحتهم فراخ، وبابا هو اللي مسحهم.

س - ماذا حدث بعد ذلك؟

ج- عمي جه لبابا وقعد معاه شوية وبعدين عمي مشي، وكان عمر دخل نام وكانت الريحة وحشة جدا ورحت لبابا قولت له إن الريحة وحشة جدا في الأوضة ومش عارفة أنام راح قالي معلش قولت له مش قادرة فجه معايا الأوضة وبص تحت السرير راح يوسف أخده وقاله تعالى وطلعوا بره الأوضة وماعرفش اتكلموا في إيه.

س - ماذا حدث صباح اليوم التالي؟

ج - لما صحيت لبسنا أنا وعمر أخويا الصغير وكنا رايحين المدرسة وبابا قال هوصلكم ورحنا مع واحدة صاحبتي وبابا قالنا ماترجعوش علي البيت ولما رجعنا رجعنا علي بيت عمي ومن ساعتها مارجعناش البيت تاني.

شقيق المتهم: «أخويا طلب مني كوباية ليمون وبابا طلب مسحوق غسيل»

واستمعت جهات التحقيق ﻷقوال شقيق المتهم الأصغر.. وإلي نص التحقيقات:

س- هل شاهدت شقيقك المتهم يوسف في المنزل يوم الجريمة؟

ج- نعم وهو ساعتها قالي اعمل له كوباية ليمون لإن طعم بقه وحش ودخلت المطبخ عملتله ليمون وأخذه وكان بيلعب في التليفون.

س- هل دار حوار بينك وبين والدك بعد عودته؟

ج- أنا لما رجعنا البيت بابا قالي انزل هات كيس مسحوق غسيل عشان ننظف السجاد وأخدت 10 جنيه ونزلت جيبت الكيس من دكان ورا البيت ورجعت.

س- أين كان شقيقك يوسف آنذاك؟

ج- كان في الأوضة بتاعة النوم بتاعته لوحده.

س- هل شاهدت أي شيء غير معتاد في الغرفة آنذاك؟

ج- لا أنا ماشوفتش حاجة بس كان فيه ريحة وحشة في الشقة كلها.

انتظروا الحلقة الثامنة.. كيف أثبت المعمل الجنائي التهمة رغم إخفاء المتهم الدماء بالكلور

شاهد في الحلقة الأولي: انفراد | «الوطن» تنشر الحلقة الأولى من نص تحقيقات جريمة المنشار في الإسماعيلية.. سرق تليفونه واشترى سجائر

شاهد في الحلقة الثانية: انفراد| «الوطن» تنشر الحلقة الثانية من تحقيقات جريمة المنشار بالإسماعيلية: توسَّل إليَّ قبل قتله

شاهد في الحلقة الثالثة.. «الوطن» تنشر الحلقة الثالثة من اعترافات المتهم بـ«جريمة المنشار»: أخفيت رأس الضحية أسفل السرير

شاهد في الحلقة الرابعة: انفراد| «الوطن» تنشر الحلقة الرابعة من تحقيقات جريمة المنشار بالإسماعيلية: Chat GPT قال للمتهم «حرام عليك»

شاهد في الحلقة الخامسة من تحقيقات جريمة المنشار بالإسماعيلية: «أبويا قال لي كمل مصيبتك لوحدك»

شاهد في الحلقة السادسة: انفراد| «الوطن» تنشر الحلقة السادسة من نص تحقيقات جريمة المنشار بالإسماعيلية: «جزء من الجثة تحت السرير»

• تحقيقات جريمة المنشار بالاسماعيلية
• نصوص التحقيقات في جريمة المنشار بالاسماعيلية
• ضحية جريمة المنشار في الإسماعيلية
• جريمة المنشار في الإسماعيلية
• جريمة المنشار