السيسي: «البلد فيها فلوس.. ساعدونا وإحنا شغالين عشان نخلص أسرع»
الرئيس عبدالفتاح السيسي
أكد الرئيس عبدالفتاح السيسي، أن القرى المصرية ستشهد تطويرا كبيرا في كل الخدمات وحتى على مستوى الدهان، موضحًا: «موضوع إن أنا أدخل قرية وأخرج منها على طوب أحمر كده بعد كل اللي عملناه أنتم مش هتحسوا بالفرق، لأ لازم تتدهن».
وأضاف رئيس الجمهورية خلال تفقده المعدات والمركبات والآلات الهندسية لجهات الدولة المختلفة المشاركة في مبادرة «حياة كريمة» لتطوير قرى الريف المصري: «لما سألت دكتور مصطفى الناس دي هتصرف كام عشان تدهن البيوت دي قالي في حدود 35 مليار جنيه أو 40 مليار جنيه.. لأ الحكومة مش معقول تعمل ده، ولو عاوزينا نعمله أنا مستعد، أشيل بطاقة التموين 3 سنوات وأعمل لكم كده».
وتابع: «ده كلام غريب.. هيقولوا بس الحق الريس عاوز يلغي بطاقة التموين ومش عاوز يدينا العيش، لأ لأ أنا مقصدش، لكن لو ده DEAL مناسب ليكم أنا مستعد أعمله، ممكن حد يقولي متدقش بقى، بقى أنت النهاردة مكنش فيه صرف صحي ومكنش ومكنش جاي تكلمني دلوقتي على الدهانات؟! أيوه، مش عاوزني أحلم، مش عاوزني أخلي ولادي أطفالي الصغيرين في الريف يطلعوا يلاقوا بيوتهم مدهونة وشكلها كويس.. طب معاكم فلوس؟! مش عارف، طب الغارمات دول إيه؟! اللي بيجيبوا 2 تلاجة و2 غسالة و2 بوتاجاز و2 تليفزيون و100 بطانية ومش عارف 50 عباية ..لأ في فلوس، بس ده أولى بقى».
وأردف: «أتمنى إنكم تساعدونا وإننا بنعمل شغل في القرية استحملونا وكل ما تساعدونا هنقدر نخلص المشروع بسرعة، وفكرة إن البيت ميبقاش دور ويبقى دورين وتلاتة ده أمر مهم أوي».