حورية فرغلي وأمير كرارة وشيرين عبدالوهاب
مخلوقات غريبة وأطفال من العالم الآخر وعفاريت وجن وشقق مسكونة، قصص ومواقف ليست من الخيال ولكن حدثت بالواقع، هذا ما أفصح عنه عدد من نجوم الفن بقصص الماورائيات، كان آخرها ما كشفت عنه الفنانة حورية فرغلي من رؤيتها ولد وبنت من العالم الآخر.
كشفت الفنانة حورية فرغلي، عن وجود مخلوقات من العالم الآخر في شقتها قائلة: «عندي في البيت بنت وولد من العالم الآخر وبشوفهم على طول وبيهزروا معايا كتير، وبيخبطوا على الباب وبيفتحوا الباب وبيعملوا حاجات كده».
وتابعت: «دايما بشوف البنت قاعدة على السفرة وشعرها زي شعري كده كاريه، وهي صغيرة كده والولد لابس شورت وفانلة وتقريبا هما الاتنين في نفس السن، وصغيرين بس شكلهم لطيف جدا وكيوت كده شعرهم أسود وشبهنا كده»، وذلك في تصريحات لبرنامج «حبر سري» على فضائية «القاهرة والناس».
وقالت شيرين عبدالوهاب عن رؤيتها أشياء غريبة في منزلها، «الأشياء في المنزل تكون أمام عينى وفجأة تختفي بسبب العفاريت اللي في بيتي، وأول ما ابتدى أرحب بيهم وأدلعهم ألاقي الحاجة، بسمع حاجات بتناديلي، وأقول حاضر جاية أهو.. مش بروح لكن برد السلام، مش بخاف منهم»، وذلك خلال لقائها ببرنامج «صاحبة السعادة»، المذاع على شاشة «dmc»، وتقدمه الإعلامية إسعاد يونس.
روت الفنانة مها أحمد حدوث أشياء غريبة لها أثناء وجودها في شقة بالإسكندرية أثناء عرض مسرحية «حلو الكلام»، قائلة: «أخدت الشقة وأول ما دخلت لقيت النور بيطفي وينور.. يا جماعة الكهربا فيها حاجة؟ الراجل قالي يا آنسة متقلقيش».
وأضافت أن والدتها وخالتها قررا الإقامة معها لفترة في الإسكندرية: «والله العظيم ده فعلا حصل وهما نايمين، خالتي كانت بتحس حد بيشيل البنس من شعرها، وماما في حركة حواليها وهي نايمة في البيت، واتضح أن الشقة دي كان فيها راجل متجوز واحدة وعنده 4 عيال اكتشف إنهم مش ولاده، وقتلها وقتل العيال والشقة دي بتتأجر عادي»، وذلك خلال لقاء على شاشة قناة «الحياة».
وحكى أمير كرارة عن الرعب الذي تعرض له من الحادث، بعد أن سار في شارع بجوار البيت، قائلا: «الشارع ده كنا بنلعب فيه وإحنا صغيرين، حنيت ليه في يوم من الأيام، اشتريت لب وفضلت ماشي مستمتع، لقيت صوت رجل ماشية ورايا، اترعبت وفضلت ماشي وفي حاجة ماشية ورايا، صوت رجل، وابص ملاقيش حاجة».
حاول «كرارة» أن يتمالك نفسه، وأثناء محاولة النظر إلى الخلف مرة أخرى، ضربه على رأسه: «لسه ببص ورايا لقيت خيال، قام رافع إيده وضربني على دماغي بشاكوش وقعت على الأرض وجالي شرخ في الجمجمة»، وذلك خلال لقاء ببرنامج «تخاريف»، المذاع على شاشة قناة «mbc1».
وقالت الفنانة الراحلة مها أبوعوف إن والدتها كانت ترغب في شراء فيلا «سلفادور شيكوريل» الموجودة في منطقة الرمل بمدينة الإسكندرية، وبالفعل تمكن والدها من شراء الفيلا، رغم كونها كانت «متشمعة»، وأخذوها على مسؤوليتهم الخاصة.
كان خال مها أبو عوف، يمكث معهم في الفيلا، وبينما كان في غرفة المكتب يتصفح بعض الكتب، شعر بالإرهاق وأغلق النور ووضع رأسه على المكتب، وبدأ يسمع أصوات طقطقة على الأرضية، وعندما رفع رأسه وجد رجلا أسود بشعر أبيض وعينين بارزتين عن وجهه، ويرتدي ملابس تشبه القساوسة، فتعرض لصدمة قوية تسببت في اكتساب شعره للون الأبيض من شدة الرعب مما رآه، وذلك خلال لقاء ببرنامج «أنا وبنتي» على شاشة «on».
تعليقات الفيسبوك