فى الكافيه: «مخمخة» قهاوى
«مخمخة» قهاوى
كثيراً ما كانت المقاهى والكافيهات عنواناً لإهدار الوقت، مجرد «قعدة» مع الأصحاب تحيط بها الأدخنة من كل اتجاه.. لكن الأمر بدأ يختلف شيئاً فشيئاً، وأصبح كثيرون يستغلونها فى الترتيب والتدبير لإعداد وتجهيز «الإيفينتات» الخاصة بالأنشطة الطلابية، ومن ضمن الأنشطة الطلابية التى تتخذ من الكافيهات والمقاهى مجلساً لاجتماعاتها هو TNT. وعن ذلك النشاط الطلابى يبدأ أيمن حسين (22 سنة)، رئيس النشاط الطلابى، حديثه عنه: «تى إن تى» نشاط طلابى بدأ فى مدينة العاشر.. من سنة 2012.. كان هدفنا الرئيسى إننا نساعد طلبة ثانوى على تقليل الفرق بين حياة الثانوى والجامعة.. ودايرة مكتب التنسيق والمجموع اللى بيحدد المستقبل عن طريق الكلية اللى بيختارها.. وكنّا بنعمل ده عن طريق فعاليات بنشرح فيها خبراتنا الحياتية اللى شُفناها فى الجامعة.. وتطورنا لأننا بدأنا نساعد طلبة جامعة على تقليل الفجوة اللى بين الدراسة العلمية والجانب العملى فى الشغل.. وده كان عن طريق كورسات فى مجال الـbusiness زى إدارة المشروعات وإدارة الموارد البشرية والتسويق وفنون المبيعات وغيرها من المجالات.. وناويين ندخل شوية مجالات مختلفة فى الهندسة زى الطاقة المتجددة والمعمار الصديق للبيئة.
«لازم كلنا نساعد الطلبة وعشان كده هنعمل إيفينت نوصل للناس مهارات جديدة فى مجالات البيزنس المختلفة.. وده عن طريق محاضرات عن النظريات المختلفة اللى فى المجالات دى»، هكذا بدأ محمد عشماوى حديثه عن الفعالية المقبلة. ثم استكمل حديثه قائلاً: «الـbusiness فى البداية كان عبارة عن شوية مهارات بتكون فى الإنسان بشكل طبيعى.. ولكن مع الوقت الموضوع تطور وبقى علم ودراسة.. ولكن الواضح أن الأساس دايماً بيكون الفطرة.. لأن الموهبة مع تدريب بتكسب.. والفعاليات اللى بنعملها كل دورها إنها بتساعد الناس تحط رجلها على أول الطريق وتكتشف إذا كان عندها الموهبة دى وده عن طريق الموضوعات اللى بنشرحها زى مهارات التواصل والتفاوض والقيادة والعمل الجماعى».
ولا يقتصر دور الدعاية والإعلان فى نشاط TNT الطلابى على الدعاية على الإنترنت فقط، فيؤكد أحمد جودة «إحنا بننزل عالأرض عشان نعرف الناس أكتر عن النشاط الطلابى وهدفه والإيفينت اللى هيعمله.. وده هيخلى الناس تكوِّن صورة عننا بشكل رسمى. وبننزل بحملة على الأرض فى أماكن تجمع الشباب وطلبة ثانوية والجامعة فى العاشر زى معهد التكنولوجيا ونادى الرواد والنادى الاجتماعى، وغيرها من أماكن التجمعات فى العاشر من رمضان»، يعنى مش لازم كل تجمعاتنا على القهوة تكون عشان شرب الشاى والقهوة والشيشة والسجاير، لا ممكن كل مجموعة شباب تستفيد من القعدة دى بفكرة أو مشروع تشغل بيه وقتها.