من كام يوم نزلت اشتري حاجات من سوبر ماركت، كانت أول مرة ليا أدخله وأول مرة أشوف ترتيب السلع المعروضة جواه، و فجأة حسّيت للحظة إني شفت المكان ده قبل كده، وبنفس المشهد، حتى شكل رجل الكاشير، كأني كل يوم بشتري حاجات من المكان ده وبشوف نفس الرجل.
إيه ده؟! في إيه؟ وللعلم دي مش أول مرة أحس بالإحساس ده. أوقات كتير أقعد مع ناس أول مرة أشوفهم في مطعم أو كافيه وأحس برضه إني شفتهم قبل كده بنفس شكلهم وشكل المكان كمان، المرعب في الموضوع إني كمان ممكن أحس بالكلام اللي هيتقال وإحنا قاعدين، وألاقي حد بيقوله في نفس الثانية.
طبعا استغربت جدا، وكل مرة تحصل لي بيجي لي شعور غريب، وابدأ اسأل نفسي "هل أنا الوحيدة اللي بيحصل لي كده؟".
هل ده بيدل على وجود قوة في عقلي الباطن تجعلني أشعر وأتنبأ بالأشياء قبل حدوثها؟! إيه الكلام الكبير اللي بقوله لنفسي ده؟ هههههه
ولما زهقت سألت أصحابي، هو إنتم بيحصل لكم كدة زيي، ولا أنا كده زي أحمد الفيشاوي في فيلم الحاسة السابعة؟!
ولأول مرة اسمع الإجابة "وإحنا كمان " بصوت جماعي، طبعا فرحت علشان مش لوحدي لأنها حاجة تخلي الواحد قلقان، بس برضه طبعا الفضول عندي زايد حبتين، وسألت أصحابي السؤال المتوقع "طيب هو ده بيحصل لنا ليه.. حد عارف؟"
طبعاً الإجابات كانت معظمها نصف منطقية، في منهم كانت إجابتهم مبنية على المعلومات المنتشرة على مواقع التواصل الاجتماعي، وكانت منها مثلا اللي قالت لي إن الإنسان وهو جنين في رحم أمه بيشوف حياته كلها من يوم ولادته لحد قبل ما يتوفي، وعلشان كده لما بيتولد ويكبر بيحس إنه شاف الموقف ده قبل كده.
وفي إجابة تانية بس كانت عفاريتي شوية.. واحدة قالت إن في حاجة اسمها تناسخ أرواح، يعني كنا عايشين في أجسام ناس تانية في عصور سابقة وشوفنا ناس كتير وأرواحنا دخلت بعد كده في أجسامنا في العصر ده، طبعا رد فعلي إني ضحكت بصوت عالي وقلت لها "لأ أبوس إيديك بلاش الرد ده إحنا مش في كفر دلهاب"، وضحكنا طبعا.
طبعاً الموضوع بالنسبة لي كبر قوي، عايزة أعرف إيه ده، خصوصا بعد ما تأكدت إنها ظاهرة بتحدث لناس كتير، عملت search على جول وكتبت "أحداث عشناها قبل كده"، وطلع لي اسم الظاهرة وهي "ديجافو" أو "deja vu" وهي كلمة فرنسية معناها حدث من قبل.
وطلعت تفسيرات نصفها كانت الإجابات اللي أصحابي قالوها، والتفسير الآخر كان محاولة غير موثقة من بعض العلماء علشان يفسروا الحالة، بعضهم قالوا إن بعض الناس بيحصل لهم كده عشان عندهم مركز الرؤية، واللي هو في آخر الجمجمة يعني في مؤخرة الرأس، بيخلي عين واحدة تشوف قبل التانية، وتنقلها لذاكرة المدى الطويل، وهى المفروض تنقلها لذاكرة المدى القصير، فيشعر الإنسان إنه شاف الموقف ده كله قبل كده، وكل ده بيحدث في جزء من الثانية.
ومش بس كده، ده أنا قرأت إن ظاهرة عكسها تماما اسمها Jamais vu، ومعناها إنك في لحظة من الثانية تحس إن الشخص اللي قاعد معاك أول مرة تشوفه حتى لو والديك؛ وتسأل مين دول ؟ أو أحيانا تحس وتسأل نفسك مثلا "هو أنا فعلا متجوز؟! وده حصل إمتى؟!"
فعلا ظواهر عجيبة، وكل ده والعلماء بتقول إنها مجرد نظريات ليست مؤكدة.
بعد كل ده حصل لك إيه بقى فيهم..
يعني عندك deja vu ولا jamais vu