عزيزتى المعترفة بالحب فى مجتمع يُحرمه
تحيه طيبه وبعد
احترسى.. ممنوع الاقتراب، فهذة المنطقة محظورة
الحب عيب، وكمان حرام
بتحبى! وكمان بتقوليها فى وشى من غير ما تتكسفى على دمك؟ إنتى عاوزة تفضحينا، مش عارفة الناس بتقول إيه على البنت اللى بتحب، يا بنتى الحب عيب وحرام، اوعى تكونى قولتى لحد إنك بتحبى، الكلام ده لو وصل لأبوكى مش بعيد يموتك فيها، ولو وصل لحد من قرايبنا أو الجيران هنتفضح، إحنا مش بتوع حب ولا كلام فارغ من ده ركزى فى كُليتك.
مشيت من قدام أمى وأنا كلى خوف ورعب من طريقة ردها عليا بعد ما اعترفت لها إنى بحب واحد زميلى فى الجامعة.
اللى فاجئنى إنها ما اهتمتش تسمع منى حكايتى، محاولتش تعرف أى تفاصيل، مين الشخص ده؟ ظروفه إيه؟ علاقتى بيه عامله إزاى؟ هو كمان بيبادلنى نفس الشعور ولا لأ؟ اكتفت بإنها تنهال عليا بالتهديدات والتوبيخ علشان تمحى الفكرة من دماغى، ما حاولتش حتى تحتوينى أو تسمع منى.
اكتفت أمى بإنها تسمع نص الحكاية وقفلت باب النقاش قبل ما احكي لها الجزء المهم واللى كان بالنسبة لى أكبر بكتير من صدمتها، كل اللى كان شاغلها إزاى تدارى على العار والفضيحة اللى أنا عملتها من وجهة نظرها وتحاول تداريها قبل ما أى حد يشم خبر بالموضوع.
الحقيقه إنى كنت بحب من طرف واحد بقالى فترة طويلة، كان نفسي قوى أحس بمشاعر متبادلة مع الشخص اللى مشاعرى اتحركت تجاهه، فكرت في يوم اعترف له بحبى، كنت خايفة أفضل ساكتة يضيع منى، قولت لنفسي هو أكيد هيتقبل لأنها مشاعر حقيقية ومحترمة، مكنتش متوقعة إن الاعتراف ده هيكون سبب فى نهاية علاقة مش فى بدايتها.
يعنى إيه بتحبينى! هو فى بنت محترمة بتروح تعترف بحبها لراجل؟ اطمن لك إزاى بعد كده؟ المفروض إن الراجل هو اللى يعترف بحبه الأول مش الست، على فكرة أنا كنت حاسس فعلا بمشاعر من ناحيتك بس بعد اعترافك ليا أنا عمرى ما أقدر ارتبط بيكى، إحنا اتعودنا إن الراجل هو اللى يقول مشاعره مش الست.
رد فعله كان صادم بالنسبة لي لدرجة إنى سبته ومشيت من غير ما أحاول حتى أرد عليه أو أدافع عن نفسى وعن مشاعرى، إزاى مشاعر الحب المحترمة تتقابل بالرد ده؟ يعنى إيه مش هيطمن لى؟ ويعنى إيه المفروض إن هو اللى يعترف الأول مش أنا؟ ده كمان قالى البنت لازم يكون عندها حياء! إيه اللى أنا عملته قلل من حيائى.
رد فعل أمى خوفنى، ورد فعل الشخص اللى اعترفت له بحبى خلانى مش قادرة أفهم وجهة نظر المجتمع الغلط عن الحب وخاصة للبنت، أمى قالت لى عيب وحرام، إزاى عيب وإزاى حرام والرسول عليه أفضل الصلاة والسلام، قال ما رأيت للمتحابين خيرا من النكاح.
أمى ما غلطتش، هي ردت عليا بالمفاهيم اللى اتربت عليها، قفلت فى وشى الباب، خافت من المناقشة، خافت تخالف مفاهيم المجتمع الغلط اللى فرضتها وحطها تحت بند العيب والفضيحة، مع إنها المفروض كانت تحتوينى، تسمعنى، تشوف الشخص ده مناسب ليا فى الوقت ده ولا لأ، المفروض كانت تسمع حكايتى، يمكن كانت غلط من أساسها وواجبها كأم تعرفنى إزاى اتعلم من أخطائى.
بصراحة رد فعل الشخص اللى حبيته فوقنى، خلانى أتأكد إن مش هو ده الشخص المناسب اللى يستاهل حبى، أكد لى أنه شخص غير ناضج، حافظ مش فاهم.
الموضوع عدى وحكايتى خلصت، بس لحد دلوقتى بسأل نفسى هو ليه المجتمع بيحرم الحب للبنت وبيعتبره فضيحة وعار؟ وهو أنا لو حسيت مشاعر تانى تجاه حد أقول له علشان أنا مبعملش حاجة غلط ولا اكتم مشاعرى؟ إيه علاقة الحياء بالحب؟ ومين الشخص اللى المفروض أسأله أو احكي له ويرد عليا ردود حقيقية وواقعية؟
بصراحه أنا بدأت أقتنع أن الحب عيب، واعتراف البنت بالحب حرام.
إمضاء/
بنت كانت بتحاول تحب فى مجتمع ممنوع الحب