- ابن وقته: يا نهار منهار وليل مالوش آخر.. إيه اللى أنا شايفه ده.. رمضان البواب راكب توك توك!.. واد يا رمضان.. واد يا رمضان!.
- رمضان: ثانية واحدة يا ابن وقته بيه.. هاحاسب عَ المشوار.. (إلى سائق التوك توك): كام يا ذوق؟!.
- السائق: 8 جنيه!.
- رمضان (معترضاً): ليه.. انت يا دوب مشيت بيّا شارع.. وبعدين أنا عامل المشوار ده إمبارح ودافع فيه 4 جنيه.
- السائق: اخلص.. أنا مش فاضى لك.. كل حاجة غليت!.
- ابن وقته: ادفع له يا فالح وتعالى.
- رمضان: خد.. بالسم الهارى.. (إلى ابن وقته): الحمد لله أن سعادتك شفت بعينيك.
- ابن وقته: فعلاً شفت.. شفت واحد غرقان فى النعيم.. مش عاوز يبوظ التاتو اللى راسمه على بطن رجله بالمشى.. فركب توك توك ودفع له 8 جنيه.
- رمضان: مش باجيب طلبات السكان.. انت عاوزنى أشيل كل ده على قلبى وأمشى الشارع ده كله.. بعد كده يا تدونى بدل انتقال يا تجيبوا لى ماكنة.. وإلا مش هاجيب طلبات لحد.
- ابن وقته: انت بتقول إيه يا واطى.. عاوزنا نجيب لك موتوسيكل ترمح بيه فى الشوارع.. وكل شوية تقول لنا هاتوا حق البنزين.. الماكنة باظت عاوز أصلحها.. انت فاكر نفسك فى الجنة؟.. أنا هاقول لك على ماكنة تانية حلوة أوى تحل لك المشكلة.
- رمضان: ماكنة إيه؟.
- ابن وقته: ربنا خلق لك ماكنة مشى فى رجليك.. شغلها شوية.. ليّنها.. ده أفيد لمفاصلك.. جاتك وجع فى مفاصلك.
- رمضان: يا سلام!.. بسيطة كده.. عاوزنى أشيل أكتر من 20 كيلو طلبات وأمشى بيهم المسافة دى كلها على رجلى؟!.
- ابن وقته: وترمح كمان!.
- رمضان: كل ده علشان ما توفروا حق التوك توك.. وعلى فرض إنى وفرت لكم.. أعيش فى الغلا ده إزاى.. ساندوتش الفول داخل على 5 جنيه.
- ابن وقته: يبقى دمّس فول.. الكيلو الواحد يعمل 50 ساندوتش!.. التعبان يشيل على قده.
- رمضان: طيب والطبيخ!.. ده برطمان الصلصة بأكتر من 10 جنيه!.
- ابن وقته: مصيبة سودة.. وليه مراتك ماتقعدش وتعمل برطمانات صلصة وتخزّنها فى الأيام اللى بترخص فيها القوطة؟.. وبعدين ما انت بينزل لك طبيخ م الشقق قد كده.
- رمضان: لازم تزوّدوا لى المرتب.. على الأقل علشان أعلم عيالى.. ولا مايتعلموش كمان؟.
- ابن وقته: ما انت مقدم لهم فى مدارس الحكومة!.
- رمضان: والدروس؟!.
- ابن وقته: يا ابن المجنونة.. انت مدخلهم دروس.
- رمضان: طبعاً.. مش من حقهم يتعلموا زيهم زى العيال كلها.
- ابن وقته: لأ مش من حقهم.. الفقير اللى مايذاكرش خسارة فيه التعليم.. إحنا زمان لا كنا بنجيب كتب خارجية ولا بناخد دروس، وكنا فى فقر أكتر م اللى انت فيه وفلحنا.. الحاجة يا واطى أم الاختراع.
- رمضان: أم الاختراع؟!.
- ابن وقته: وأبوه كمان.. (وهو يمد يده إليه بأكياس يحملها): عايش عَ الصلصة والدليفرى.. وعاوز يزود مرتبه.. ما تمسك منى الأكياس يا واطى.. انت مش شايفنى شايل!.
- رمضان: سامحنى يا ابن وقته بيه.. لازم أطلع الطلبات للسكان.
- ابن وقته: وأنا؟!.
- رمضان: ربنا خالق لك ماكنة فى إيدك.. ليّنها بشيل شوية الأكياس دول.
- ابن وقته: بس دى تقيلة!.
- رمضان (وهو يهرول نحو السلم): التعبان يشيل على قده.
- ابن وقته (وهو يعدو وراءه يريد صفعه): امشى يا واطى.