الأولة
الحاجة أم الاختراع
وأنا اخترعتك م الحاجة
قلبي يضيق
قلبك يساع
تنزل دموعي بسذاجة
مليان عقد
معقود صراع
روحي صريعة ما تحييها
الحيرة أصلا بنت ليل
والخطوة تايهة رَسيها
أفكاري شوك وشوق وطوق
معادلة صعبة حِليها
تفاصيلي مُرة و"مسكونة"
لأ مش هقولك حَليها
عدوية بيغني ف روحي
راحوا الحبايب من بدري
قدَري أكون زي متاهة
قدرك تداوي ف جروحي
القافية ماسخة ومنسوخة
تشبه حياتي..
يا إيزيسي..
وانتي الوحيدة ف حكاياتي
فيكي أصالة الفراديسِ
شعري حشايا وسكيني
إزاي قوليلي أبطل نوح
كونيلي زادي وتلقيني
وقت انقطاع البوح م الروح
جوايا شرخ ملوهش أرار
جواي صوامع بلا عابد
قلبي عايزله بدل فاقد
كلامي جد / حياتي هزار
الشمس دايما تتسول
غنا العيال ف الصبح يا نور
إرويني بس ولو ضحكة
علشان ما تنبت أرضي البور