- عم صيام: ناولينى الشفشق اللى عندك.
- منى (زوجته): أبوس إيدك خلص تكسير البلح ده.. أنا دماغى صدعت.. إكسره بايدك.. وكفاية رزع!
- عم صيام (وهو يواصل التكسير): هو البلح يبقى بلح إلا لو كان ناشف زى الحجر لازم يترزع عشان يتكسر.. بعدها يتحط فى المية يحن ويطرى ويخرفش.. يا سلام!
- منى: كل يوم تعمل الشفشق ومحدش بياكله غيرك.. والباقى يترمى.. إمبارح غرقت فى شفشق قمر الدين.. ومقدرتش تشرب حاجة تانى.. ارحمنى يرحمك ربنا.
- عم صيام: إذا كنت انتى ولا ولادك.. مالكمش فى الشرب.. (وهو يضع البلح فى الدورق): كده تمام.. ناولينى بقى الشاشة.. زمان عجينة العرقسوس خمرت.
- منى: اتفضل.. بس أبوس إيدك.. بلاش سيمفونية كل يوم!
- عم صيام: ها ها ها.. حتى العرقسوس مالكيش فيه.. سيمفونية الرغاوى سر الصنعة.. لازم الكوباية بعد ما تتملى تبقلل من فوق.. هيه الله يرحمك يا بويا!
- منى (ضاحكة): إيه.. كان بياع عرقسوس؟!
- عم صيام: بتتريقى يا منى.. هقول لك إيه.. اللهم إنى صائم!.. ناولينى الشفاشق اللى عندك خلينى أعزف على راحتى.
- منى: عرقسوس.. وكركديه.. وتمر هندى.. وقمر الدين.. وخشاف.. إيه لازمة الملمأة دى كلها.
- عم صيام: لازمتها رمضان.. رمضان يحب الملمأة.
- منى: ما الحاجة بتترمى فى الآخر.
- عم صيام: ادى اللى يفيض للواد رمضان البواب.. خليه يملمأ هو وعياله.
- منى (وهى تنادى على رمضان): رمضان.. يا رمضان.. اطلع خد الحاجات دى!
- عم صيام: ملمأ واتهنى يا رمضان.. الجو حر أوى النهارده.. (وهو يحمل دورق العرقسوس ويقربه من فمه): يا سلام لما المدفع يضرب والواحد يرفع الشفشق ويشرب وهو بيقول: «ابتلت العروق وذهب الظمأ».
- منى (بانزعاج): انت هتشرب؟!
- عم صيام (وهو يبعد الدورق عن فمه): ها.. اللهم إنى صائم.. ناولينى الخلاط خلينى أنجز فى القمر الدين.. (وهو يضحك): شوفى والنبى الاسم: «قمر الدين».. قمر!
- منى (ساخرة): قمر الدين.. ولا قمر الدنيا!
- عم صيام (ضاحكاً): كده يبقى قمرين.. ناولينى الخلاط.
- منى: اتفضل.
- عم صيام (وهو يصرخ صرخة مدوية): آآآآآآآآآآآآآآآآه... الحقينى يا منى.
- منى (بانزعاج): فيه إيه؟!
- عم صيام: اتكهربت.
- منى(وهى تنظر فى انزعاج): إيه دا؟.. كل الشفاشق اتكسرت.. الأرض بقت بركة عصير.. هقول لك إيه بس.. منك لله!
- عم صيام (بغضب): كنت عاوزانى أتكهرب يعنى.. وأنا بسحب إيدى بسرعة خبطت الطرابيزة.. وقعت الشفاشق.. أعمل إيه.. كام مرة أقول لك هاتى كهربائى يصلح الفيش.
- منى (بشماتة): الملمأة هى اللى كهربتك.. حد يحط الفيشة فى الكوبس وإيديه مبلولة؟!
- عم صيام: ما أنا عاوز أنجز.. ناقص ع الأدان ربع ساعة.. (بأسى): هفطر إزاى من غير عصاير؟!
- منى: ربنا رحمنا من الملمأة.
- عم صيام (وهو يقف منتفضاً): انتى هتعملى إيه؟!
- منى: همحى آثار المعركة!
- عم صيام (بحسم): اندهى الأول ع الواد رمضان.. خليه يجيب الحاجات اللى خدها.
- منى (بدهشة): معقولة؟!
- عم صيام: يعنى نفطر من غير ما نملمأ.. يا رمضان.. يا رمضان!