لو سألت أي حد من المصريين المترو بيمثلك ايه، هيقولك الزحمة والكآبة وريحة العرق، وعشان الصورة دي بقت مترسخة في ذهننا كمصريين، جمعية مبدعون وهما مجموعة من طلاب كلية التربية النوعية قسم الفنون الجميلة في جامعة عين شمس، قرروا يحولوا ممر الخروج في محطة مترو الأوبرا لعالم مختلف. صممت الجمعية شكل لحوائط وسقف الممر على شكل “جلاكسي” وهو تصميم بيقوم على رسم شكل الفضاء والكواكب. وقالت سارة يوسف، عضو في الجمعية، إنهم اتفقوا مع دار الأوبرا يصمموا شكل الممر في مقابل توفير المواد اللي محتاجينها، واختاروا مجموعة من الفنانين والأدباء تكون على صور الكواكب زي عبدالحليم حافظ وأم كلثوم وفاتن حمامة ونجيب محفوظ، واسماعيل ياسين، وده علشان يعبروا عن فنهم. وعن التصميم، قالت إنهم حاولوا يعملوا عالم فضاء في الممر يحسس اللي بيمشي إنه مبسوط وحابب يتصور ويخرج من جو الكآبة بتاع المترو. ورغم إن كان في استياء من تعطل الممر بسبب الشغل اللي بيعملوه، قالت سارة إن ردود الفعل كانت حلوة جدا على شغلهم والناس اتبسطت وكل اللي بيعدي بيتصور مع صور النجوم.