كام مرة اتعشمت فيها بحاجة واتخذلت؟!
كام مرة كان نفسك تحقق شيء وضاع منك؟!
كام مرة كنت متوقع رد فعل من شخص وملقتهوش؟!
كتير قوى صح!
إحساس إنك تكون متعشم فى حاجة قوى وفجأة تروح منك صعب جدا ومؤلم، مثلا واحد متعشم فى وظيفة وشغل جديد وكان خلاص بيرتب كل حاجة إنه رايح الشغل ده، وفجأه يجيبوا واحد تانى خالص لمجرد إنه ابن صاحب المدير!
واحدة كانت متعشمة فى واحد إنه هيخطبها ويتجوزها، وكانت بترتب ميعاد مع أهلها، وكله كان تمام، وفجأة.. أصله حس إنهم مينفعوش لبعض!
واحد كان متعشم إن مديره ينقله لمنصب أعلى وأهم فى الشغل، وإن مرتبه يزيد، وفجأة.. الموضوع باظ لمجرد إن صاحب الشغل شايف إن ده كده فيه توفير للشركة!
كل واحد فينا بيتعشم وبيتخذل تقريبا كل يوم وكل ساعة، وبيبقى إحساس صعب لإنك بنيت عليه أحلام وطموحات كبيرة قوى، بس كل اللى إنت فكرت فيه وبنيته فى ثانية ضاع وكأنه محصلش!
بس إحنا ليه بنتعشم أصلا فى أشخاص!
جايز يكون حد اتعشم فيا وأنا خذلته بقصد أو دون، وجايز أكون اتعشمت فى حد وخذلنى برضه لنفس الأسباب، بس الأكيد إن ربنا عمره ما هيخذل أى حد حط أمله فيه.. بلاش نبنى أحلامنا على بعض ونرجع نزعل إن العشم بتاعنا فى الناس دى مات!