آخر قصائد النقيب "محمد وديع" من داخل محبسه الانفرادي بالإسكندرية
شامم ريحة البحر من الزنزانة
سامع قلبت موج بره القضبان
حتى البحر بيصرخ موجه معانا
حتى البحر كان ثائر غضبان
والانفرادي .. يقلب شريط الحبس من الأول
مش عايز أوصفها يقولوا بيهول
كلمت كل جماد حيطان.. بلاط.. قضبان
ما سمعت منهم رد ..غير حبسة هتطوّل
راميني لأجل انكسر واتهز واتزلل
إزاي وأنا بدعي وهو اللي بينول
هو اللي بيثبتك على طريق الحق
هو اللي بيخليك تقول لكل ظالم "لا"
هو اللي هيجمع كل الطرق تاني
بعد ما كل طريق قلبه اتشرخ وانشق
***
وجعي في طريقي انتي مش رمية الزنازين
لو ترضي عني هرضي
لا أنا احسن من اللي اتسحل ولا اللي راح لاجلك
لساكي مش راضيه وأنا اللي بيبكي حزين
يا نفسي يا قلبي يا حب عمره ما مات
يالي عشان خطرك يا ما عشت آهات
يا ما جذوع الشجر شالت في كتفي رقات
وغطست في بحرك عز الشتا ونوات
ربطوني من رجلي وإيديه ورموني في الميا
لاجل أغرق وإيديكي رفعوني
لا غرقت ولا مليت كملت بعنادي
ما هو كان خلاص حبيت وعنيكي سحروني
وعلى الحبال شقلبه ولا قرد جبلاية
طيارة أو منشأة ما فرقش ده معايا
كان كل همي رضاكي يلمسني من جوه
***
وحلمت بالتغير قالوا عبيط مجنون
ومقدرتش اتحمل كذب ونفاق وخداع
والثورة طاقت نور قتلتني بالإشعاع
جريت عليكي استني ..ماشية في طريقك غلط
ده اللي بيحميكي أكذوبة لابسه قناع
بيّتي في احضانه ورميتيني في الحبسة
وأنا اللي عاشقك ترابك حتى صبح نكسة
ارضي عشان خطري ده رضاكي بيهون ويعلم النسيان
نسيني طعم القلم كرباج في إيد سجان
خليني أقدر اكتم واصبر على الأحزان
وكفاية إني نسيت الفرح والألوان
متنسنيش شمسك اللي أنا في ضلمه
شامم ريحتها كمان