في الأول والآخر بندم..
هندم على شيء أنا ماخترتوش..
وهقول كان في في الدنيا حاجات..
أحسن من كل اللي اختارته..
هندم على قلة تركيزي..
لما أكبر هندم على فرطه..
هندم على فعلي المتسرع..
واندم جدا لو أخرته..
هلعن في الماضي وأيامه..
وافرح أول ما أفتح سيرته..
وهقول مش فارقة معايا أخسر..
بمرور الوقت أقفش نفسي..
زعلان على كل اللي خسرته..
والوقت الحلو اللي بعيشه..
كان ممكن جدا يبقى أحلى..
كان ممكن أكون جد شوية..
فأخرج بالحكمة من الرحلة..
كان ممكن أهلّس للآخر..
كان ممكن أعيش بدل السحلة..
هندم لو ضاعت مني حاجات..
الدنيا أساسا كام فرصة؟..
لو واحدة تضيع تبقى سذاجة..
هندم ع العصبية الزايدة..
وهكره أعصابي التلاجة..
فارزقني يارب الرضا علشان..
من أول آدم والإنسان..
مخلوق مابتعجبهوش حاجة..