محافظ الدقهلية: "طلّعت تعابين وزبالة من بلاعة مستشفى"
قال حسام الدين إمام، محافظ الدقهلية: «أنا بدأت أشك إن عندنا خلايا نايمة عاوزة تدمر البلد»، وأضاف: «الدكاترة بتهرب من المستشفيات، وأنا رحت مستشفى قوتها 200 طبيب لقيت الجميع وقّع فى الدفتر، ولا يوجد سوى 50 طبيباً، ولما سألت عن السبب، قالوا إن المستشفى فيها أمراض، وجهاز الأشعة محتاج صيانة، تتكلف 1000 جنيه، ولا يعمل منذ 3 أشهر، ولما ييجى واحد غلبان، يقولوا له اطلع اعمل الأشعة برة، وأسهل حاجة عند الموظف يقول إن الجهاز عطلان، ومحتاج صيانة، ويمرمط المواطن». وتابع المحافظ، أمس الأول، فى أول حديث للصحفيين، منذ توليه المنصب: «مديت إيديا فى بلاعات الصرف الصحى فى أحد المستشفيات، خرجت من تحتها تعابين وزبالة، لأنها متغطية بلوح صاج، ومش هاين عليهم يجيبوا غطاء صرف صحى»، وأبدى «إمام» استياءه من الأوضاع المتردية فى مستشفيات المحافظة، وقال: «عند زيارتى لأى مستشفى، بيحاولوا يوجهونى بالريموت كنترول: تعالى بص شوف هنا، والمكان اللى أنا رايحة بيكون مغسول، ومدهون، وصلاة النبى أحسن، ما يعرفوش إنى أنا جاى أصلاً من الشارع، أنا لا أمشى تبع خط السير، هيجرالى إيه يعنى؟ هموت؟، الحياة والموت بإيد ربنا سبحانه وتعالى». واستطرد: «أطلب من الصحافة والإعلام إنهم يساعدونا، فنحن وأنتم فى خدمة المواطن، وأنا لوحدى مش هعرف أشتغل».