بعد إغلاق شارع الهرم.. "أحمد" وجيرانه يطلقون حملة "عزّل عند أخوك"
أيام ويحين الموعد، حتى الآن لم يصدر توقيت محدد لتنفيذ قرار محافظ الجيزة بإغلاق شارع الهرم 6 أشهر متصلة، للبدء فى أعمال الحفر الخاصة بإنشاء الخط الرابع لمترو الأنفاق، ما يترتب عليه تحويل المرور بشارع الهرم إلى فيصل، ما دفع «أحمد» إلى بدء عد تنازلى للأيام التى يسكن فيها بمنزله فى نفس الشارع، خوفاً من زيادة الشلل المرورى الذى سيصيب الشارع أكثر مما فيه، مقرراً «هعزل عند أخويا».
6 صباحاً، التوقيت الذى اعتاد فيه أحمد عبدالحميد -موظف فى إحدى شركات الإنترنت- أن ينزل من بيته بشارع فيصل ليلحق ميعاد عمله بمنطقة الزمالك، «ميعادى فى الشغل 9 الصبح و3 ساعات بقعدهم فى الطريق إذا كانت أيام عادية أو إجازات عشان أوصل الشغل، شارع فيصل معروف إنه دايماً واقف ومتعطل لأنه شريان المنطقة زى شارع الهرم بالظبط وأكتر»، لم يتردد الشاب العشرينى فى قراره لحظة واحدة، بمجرد سماعه تأكيد خبر إغلاق شارع الهرم فى الأيام المقبلة، «أول ما يقفلوا الشارع ويبقى كله هيمشى من شارع فيصل يبقى الله يرحمك يا شغل، ومش قبل 5 ساعات هقعدهم فى الطريق عشان أوصل وأنزل من قبل الفجر كمان».
«هطفش من الهرم خالص».. قرار نهائى اتخذه «أحمد» قبل تنفيذ قرار غلق شارع الهرم الرئيسى وتحويل خط سيره لشارع فيصل، «شوارع الهرم كلها هتقف وهتبقى زحمة أكتر ما هى زحمة أصلاً، ومفيش بديل غير شارع فيصل، ده أنا بقالى 5 سنين عايش فيه وطبيعته واقف من أوله لآخره ويوم ما بيمشى كويس بيبقى فرح فى الشارع كله، لدرجة إن أصحابى كنت بقابلهم دايماً بره لأنهم كل ما كانوا ييجولى ونخرج فى الهرم الخروجة بنقضيها فى وقفة الشارع»، مضيفاً «عشان كده قررت من قبل ما يقفلوا شارع الهرم إنى أقفل الشقة خالص وأروح أقعد عند أخويا فى المطرية، مشاكلها هتبقى أرحم من زحمة فيصل».