غرفة صالون من الكاوتش والبراميل.. وقعدتها مريحة
غرفة الصالون
إطارات السيارات بأحجامها المختلفة، وإطارات الدراجات الهوائية، والبراميل البلاستيكية كبيرة الحجم، هى الأدوات التى استخدمها عروسان مقبلان على الزواج فى تصنيع غرفة صالون بمحتوياتها من ترابيزة ونجفة وديكورات إضاءات.
«أنا وخطيبتى قررنا إن شقتنا تكون مختلفة، وما ننزلش ندوّر على عفش تقليدى وخلاص، ما كل الناس عندها عفش، لكن المختلف إننا نعمل الحاجة بتصميمنا وعلى إيدينا، واحد صاحبى عرض عليّا يعملى الصالون كله من كاوتش العربيات، فى الأول قلقت ولما شفت الصور عجبتنى واتمسكت بيها»، كلمات هشام الشاعر، الذى تعاون مع أحد مصممى الأثاث غير التقليدى، وصنعا غرفة بسيطة بمنزله، لكنها مختلفة: «هى الفكرة مجنونة ومجازفة كبيرة، خصوصاً أن دى شقة عريس وعروسة، يعنى الناس أول حاجة هتسأل عليها العفش».
كلفت الغرفة 7500 جنيه، وهى تكلفة بسيطة جداً مقارنةً بأسعار السوق، وحرص «هشام» وعروسه على استخدام إطارات السيارات أيضاً فى إنارة وتجميل الشقة، كنجف يوضع بداخله اللمبات الملونة بشكل جمالى.
سامح عادل، موظف فى بنك، لكنه يهوى إعادة التدوير، قام بصناعة أكثر من طاقم للأنتريهات بأشكالها المختلفة، من إطارات السيارات: «لما هشام عجبته الفكرة نزلنا سوا اشترينا كل الكاوتشات اللى محتاجينها والقماش والإسفنج، وأنا اللى عملت كل حاجة بنفسى حتى التنجيد أنا اللى نجدته».