تخاريف
فـ الليل
بعد الحياة ما تنام
والصمت يملا دنيتى
وفـ وحدتى
أصب م الذكريات
كاسات..
أشربها..
أنسطل..
وتبدأ التخاريف
بضحكة حزينة
فوق شفايفى
ترسم ملامحى من جديد
ترسم على وشى العنيد
شكل مخيف
يزعج مرايتى المُعتمة
والمؤمنة
بوشى القديم
والقانى
فـ سكة واخدانى
لمكان أول لقا
بينى وبين نفسى البريئة
قصدى..
اللى كانت بريئة
واتبدلت فـ زمن الزيف
نفسى أوصل
لكن طريقى
مش بيكمل..
وتتوه الخطوة منى
حلمى الجميل
غصب عنى
ينكسر فتافيت
تنفرط عناقيد
الشوك جوايا
تمزعنى..
تصدمنى..
وافوق م الصدمة
ألاقى..
نفسى فوق رصيف
بتسول البسمة
من عيون الفرحانين
وابيع الدمعة
للى غاوى يموت حزين
وانااااااام
حاضن وحدتى
ودمعتى ملو الكفوف
أحلم..
وفـ الحلم أشوف
ذكريات..
مالية الكاسات
أشربها..
أنسطل..
وتبدأ التخاريف