طوبي للمشتاقين بالروح
و العشمانين في الجاي
و المسنودين علي بعض
طوبي للمسجونين عافيه
و الممنوعين
من الغنا
و الرسم
و الحضن
و التريقه
طوبي للمربوطين بالامل
و الفطرانين بالشقا
طوبي للي حاولوا
و اللي هايحاولوا
طوبي للي مات
و اللي حوله
طوبي للمهرج
اللي بيزاوله
طوبي للي هايرمي
و اللي هايناوله
بكره الوطن
يصبح وطن بصحيح
بكره الكلام يصبح كلام
و نبطل التلميح
بكره الغلط
يصبح غلط
مفيش ما بينا مسيح
طوبي للمشتاقين بالروح
و الشقيانين بالجسد
انتم ملح الارض
هانعمل ايه لو فسد ؟