احجز مكانك من الآن.. مرسى سوبر مان الـ«داتا شو» يقدر يظهر فى 25 محافظة فى وقت واحد
«الدكتور مرسى يقدر يظهر فى 25 محافظة فى وقت واحد» إنها خلاصة إعلانات حزب الحرية والعدالة لمرشحه فى انتخابات الرئاسة د.محمد مرسى، الاتصال بالرقم الساخن لن يحل لغز الإعلان: «احجز مكانك مع الدكتور مرسى رئيساً لمصر من 8 إلى 10 مساءً فى أى مكان فى مصر».. نص الإعلان المنشور على مساحة نصف صفحة فى معظم الصحف اليومية أمس، مرشح الجماعة سيطل على مريديه فى مؤتمر ختامى لحملته الانتخابية من منطقة عابدين بوسط البلد، فيما تظهر صورته من خلال «الداتا شو» كبث حى، فى الـ24 محافظة الأخرى - حسب مراد على، المنسق الإعلامى للحملة. وباقى المؤتمرات بمحافظات الجمهورية سيحضرها شخصيات عامة ورموز للإخوان والتيار السلفى وبعض الرياضيين والفنانين، «بفضل الله عندنا قيادات ورموز فى كل مكان فى مصر» يقولها مراد مباهياً بمرشحه، وأى فكرة يتم طرحها داخل الحملة تأخذ تصويتاً بتنفيذها ولا يحق لواحد اتخاذ قرار فردى.
«حتى آخر لحظة» يعلق منسق الحملة على اختيار ميعاد المؤتمر فى اللحظات الأخيرة قبل بدء الصمت الانتخابى، «عشان نقول للناس إحنا معاكم وجهاً لوجه من أول يوم لآخر يوم».
فى أحد المؤتمرات الجماهيرية بالإسكندرية قبل أيام قال صبحى صالح المحامى والقيادى الكبير بالجماعة «نستعرض عضلاتنا بالسلاسل البشرية.. واللى عنده أكتر ينزلهم» تعقيباً على قدرة الإخوان على الحشد المتمثلة فى السلاسل البشرية التى غطت مصر من إسكندرية إلى أسوان، وهى نفس الرسالة التى تريد الجماعة إيصالها بتغطية الجمهورية قاطبة قبل الانتخابات الرئاسية بيومين من خلال المؤتمر الحاشد لـ«مرسى» فى 25 محافظة، «ليه منقولش إن ده نوع من الوجود الفعلى على الأرض مش مجرد الخروج على الناس من برامج التوك شو» يقولها مراد، مبرراً السبب الرئيسى فى الوجود فى جميع المحافظات.
المؤتمر المقرر إقامته عقب صلاة المغرب مباشرة، يغطى تكاليفه الملايين من محبى الإخوان - حسب مراد - «كل الناس بتشتغل لله، اللى عنده محل فراشة بيساعد، وأصحاب الشركات اللى عندهم سماعات بيجيبوها، والحزب نفسه عنده مقرات فى كل منطقة فى مصر، وكلها فيها أدوات لعمل المؤتمرات دى».