قيادي بـ"الحرية والعدالة": أخطأنا بوضعنا قيادات الإخوان في منزلة الرسل
هاجم على خفاجى أمين شباب حزب الحرية والعدالة المنحل بالجيزة، جماعة الإخوان المسلمين.
وقال عبر حسابه الشخصي على "فيس بوك"، اليوم، "بشكل واضح الجماعة بتمر بأصعب لحظات حياتها، ولسه مازال اللي خايف يتكلم ويحكي بحجة شق الصف وميعرفش إن بسكوته ده بيشق الصف بنفسه.. عالم ضيعونا ودلوقتي بيجهزوا علينا شايفين الجماعة عزبة أبوهم.. ربنا ينتقم منك ياللي كنت السبب في الكارثة دي ويورينا فيك يوم إنت وكل معاونيك ومساعديك والمطبلاتية اللي مشغلهم".
وأضاف خفاجي "الدكتور محمود حسين اللي كان أمين عام للجماعة، اللي كان بينزل بيانات باسم الجماعة يقول فيها وقتها ليس لنا ممثلين في كذا وكذا وليس لنا متحدث غير متحدث الجماعة وفلان لا يعبر إلا عن نفسه
طلع دلوقتي محمد منتصر المتحدث الاعلامي للإخوان قال إن في أمين عام للجماعة تم تعينة في فبراير الماضي، وإن المتحدث باسم الجماعة هو المعبر عنها مش حد تاني، وإن اللي قال حاجة ده بيعبر عن نفسه".
وواصل خفاجي هجومه مشيرًا إلى "تعظيم قيادات الإخوان، وكأنها رسل من عند الرب"، حسب قوله، "كلنا كنا السبب في اللي حصل دلوقت، سكوتنا على الغلط، تطبيلنا على كلام ملوش أي معني ولا لازمة بس خارج من بوق قيادي، تكرارنا لنفس الخطوات الغلط اللي بتودي لنفس النتائج، خوفنا من إننا نقول الحقيقة للناس بحجة وحدة الصف، تعظيمنا لبعض القيادات وكأنها رسل من عند الرب، هذه فرصة جيل جديد من غير هذه الوجوه لتصحيح كل هذه الأخطاء".