رسالة "لوم" من أم الشهيد صلاح لمقاطعي الانتخابات: حرام عليكم دم ولادنا
الشهيد البطل محمد صلاح
"يوم الانتخابات ده مر عليا صعب جدا وكنت حاسة محمد وروحه حواليا، كنت مصممة وحريصة أنزل انتخب من أول يوم، اليوم ده مر عليا بوجع كبير أوي علشان ابني البطل زي اليوم ده من 4 سنين كان بيأمن لجنة في محافظة المنصورة، كان عارف قيمة الرئيس عبدالفتاح السيسي وقيمة اللي بيعمله لمصر" هكذا بدأت زينب محمد عبدالحميد، والدة الشهيد محمد صلاح، حديثها عن كواليس مشاركتها في الانتخابات.
السيدة زينب، الذي استشهد نجلها بمعركة البرث مع الشهيد البطل أحمد المنسي، وروى زملائه بطولته واستبساله، حينما طلب من إدارة المدفعية ضرب البيت عليهم وهم أحياء كي لا يتمكن التكفيريين من الهرب، قالت لـ"الوطن": "كان لازم أنزل حتى لو كان صعب عليا علشان خاطر الشهداء اللي ضحوا بحياتهم علشان مصر، وابني طلب الشهادة في مقابل ميترفعش علم غير علم بلده ولا حد يقرب من جثث زملائه الأبطال وعلشان يحافظ على بلده وأرضه".
وأضافت والدة الشهيد صلاح: "مش كتير على شهدائنا ننزل علشانهم وندي صوتنا للرئيس عبدالفتاح السيسي اللي طلب يحافظ على مصر ويطهر سيناء من الإرهابيين، واللي بيحافظ على حدودنا واللي وقف البلد على رجليها وعملنا مشاريع عملاقة".
وجهت "الحاجة زينب"، رسالة لكل من لم يصوت في الانتخابات قالت فيها: "لو عاوزين تريحوا الشهداء وحاسين بتضحياتهم انزلوا على الأقل علشان خاطر الشهداء اللي راحوا يبقو مستريحين وعلشان يحسوا انه في ناس قدرت التضحيات بتاعتهم، لازم تنزلوا وتحافظو على بلدكم".
واصلت الحاجة زينب حديثها للمقاطعين قائلة: "ولادنا حافظوا على البلد على الجبهة حافظوا على إنتو عليها جوة، الشهداء أدوا مصر روحهم، إنتوا مستكترين تدوها صوتكم".
وانهمرت الحاجة زينب في البكاء موجهة اللوم للمتقاعسين عن الإدلاء بأصواتهم: "حرام عليكم دم أولادنا متحافظوش عليه، هما ميعرفوش إننا قدمنا أعز حاجة عندنا علشان مصر".
وانطلقت الانتخابات الرئاسية، أمس الأول، وتستمر لثلاثة أيام، يتنافس فيها الرئيس عبد الفتاح السيسي، ورئيس حزب "الغد" موسى مصطفى موسى.
ويحق لـ59 مليونا و78 ألفا و138 ناخبا، الإدلاء بأصواتهم في الانتخابات الرئاسية لعام 2018، وهم إجمالي الناخبين المقيدين في الكشوف الانتخابية، ويشرف على العملية الانتخابية 18 ألفاً و620 قاضياً من 4 هيئات قضائية، على 13 ألفاً و706 لجان فرعية بجميع المحافظات، و110 آلاف موظف إداري وسط إجراءات أمنية مشددة. وحددت الهيئة الوطنية للانتخابات، برئاسة المستشار لاشين إبراهيم، الثاني من أبريل لإعلان نتيجة الانتخابات.
وفي حال أسفرت النتائج عن الحاجة لإعادة، ستجرى انتخابات في الفترة من 19 إلى 21 من أبريل بالنسبة للمصريين في الخارج، وفي الداخل ستجري الإعادة من 24 إلى 26 أبريل، وتعلن النتيجة النهائية في الأول من مايو.