الشباب حائرون.. بين حقائب الـ«كروس» والـ«باك» لمستلزمات المدارس والجامعات
الشباب حائرون.. بين حقائب الـ«كروس» والـ«باك» لمستلزمات المدارس والجامعات
مع بدء دخول الطلبة المدارس والجامعات، وبينما ينشغل الأهالى بتدبير نفقات المدارس والدروس الخصوصة لأبنائهم، يشغل بال الشباب اختيار بعض التفاصيل الخاصة بالاستايل الذى سيظهرون به بين زملائهم فى أول العام الدراسى، ومن ضمن تلك التفاصيل أشكال الحقائب التى وألوانها وأنواعها وفقاً لما يهواه كل شاب أو فتاة.
«بحب الشنط الاسبور بشكل عام، والألوان تكون أسود فى أى لون تانى زى أصفر أو لبنى أو أبيض أو كحلى»، قالها على مصطفى، 18 سنة، وهو يوضح أهمية أن تكون الشنطة مريحة، فقال: «بفضّل الشنطة تكون باك لو فيه كتب كتير عشان تبقى عملية ومريحة، لكن فى الدروس بشيل شنطة كروس عشان مابتبقاش تقيلة ومش هتتعب كتفى».
معايير شراء الحقيبة لديهم أن تكون عملية وتتناسب مع وسائل مواصلاتهم
وشاركه محمد الديب، 21 سنة، فى تفضيل الشنط الاسبور قائلاً: «فى الغالب ما بروحش الجامعة بشنطة غير فى فترة الامتحانات عشان الورق اللى براجع منه، وبحبها تكون سبور صغيرة ولونها أسود أو كحلى أو أحمر».
بينما قال سليم أبوالفضل، 20 سنة: «بحب الشنط الباك اللى فيها ألوان كتير زى الأصفر واللبنى والأزرق، عشان بتكفى حاجتى ولبس الكورة والكاميرا».
«بحب الشنط الكروس، كبيرة أو صغيرة، المهم ماشيلش شنطة فى إيدى عشان مش عملية ومابحبش الشنط الباك عشان بحس انها بتاعة المدرسة، لكن الشنط الكروس عملية جداً، خصوصاً مع بهدلة المترو كل يوم»، هكذا تحدثت مريم عبدالحكيم عن نوعية الحقائب التى تفضلها.
وقال محمد الشامى، مدير أحد المحلات المتخصصة فى بيع الحقائب: «هناك تنوع كبير هذا العام فى الأشكال والألوان، والإقبال على الحقائب من جانب الشباب يكون دائماً كبيراً»، مشيراً إلى أن «الحقيبة الجلدية بألوانها المختلفة موضة السنة دى للبنات والأولاد، وعليها إقبال من طلاب الثانوية والجامعات، والشنط اللى فيها شراشيب مناسبة للجامعة لكن مفيش إقبال عليها من طلاب المدارس، وأيضاً طلاب الجامعة دايماً بيفضلوا الشنط الاسبور».
وأضاف «الشامى»: «البنات دائماً يقبلن على الألوان المتداخلة والنقوشات المتنوعة والمشجرة وأكثر الألوان اللى بيفضلوها الفترة دى هى البينك والموف، أما بالنسبة للأولاد فأغلبهم يقبلون على التصميمات السادة وألوان الأسود والكحلى».