حواديت صيدلانية لتوعية المواطنين بالأدوية
عمرو حجازى
«كان ياما كان يا سادة يا كرام، كان فيه دكتور صيدلى نفسه يوعى الناس، ويعرفهم الفرق بين أنواع الأدوية والمستحضرات اللى بيستخدموها ومايعرفوش عنها غير شكل عبوتها ولونها، فقرر يحكى لهم حدوتة تتضمن المعلومة بشكل بسيط».. تلك هى الطريقة التى يتبعها عمرو حجازى، صيدلانى، لتوعية الناس من خلال فيديوهات ينشرها على مواقع التواصل الاجتماعى، يشرح من خلالها لجمهور الـ«سوشيال ميديا» الفرق بين عبوات مستحضرات التجميل والكريمات، التى يستخدمها الناس من نفس الماركة، ويقتصر الاختلاف الوحيد بينها على لون العبوة.
مبادرة إيجابية تبناها «حجازى» لمساعدة الجمهور، يقول «عمرو»: «اخترت الحدوتة لتوصيل رسالتى، لأنها بتساعد بشكل كبير على توصيل المعلومات، وبتجذب مختلف فئات المجتمع، خاصةً إن السوشيال ميديا واصلة للناس أكتر من التليفزيون والراديو، دلوقتى تقريباً كل فرد فى البيت عنده أكونت على الفيس بوك، فلو نجحت أوصل معلومتى لشخص واحد من كل بيت، يبقى نجحت فى تغيير مفاهيم أسرة كاملة».
عبّر رواد مواقع التواصل الاجتماعى عن إعجابهم بفكرة «عمرو»، من خلال التفاعل الكبير مع المقاطع التى ينشرها على «فيس بوك»، ويتداولها البعض على صفحاتهم الشخصية.