ثورة الإنترنت لـ"وزير الاتصالات": "وعودك كلام معسول"
وصف شباب "ثورة الإنترنت"، المحاولات الأخيرة للمهندس خالد نجم، وزير الاتصالات وتكنولوجيا المعلومات، والتي حاول خلالها إقناعهم بتهدئة الموقف بـ" الكلام المعسول"، مؤكدين استكمال ثورتهم حتى تتحقق مطالبهم.
ونشرت صفحة "ثورة الإنترنت"، على صفحتهم بـ"فيسبوك"، بيانًا جاء فيه: "لما نزلنا ضد الوزير السابق عاطف حلمي أكتر من وقفة كانت لأننا عايزين إنترنت أفضل وأرخص، وحاليًا بعد الوعود الكتير اللي الوزير الحالي خالد نجم قالها (النت في مصر هيبقى أفضل من دبي) وغيرها كتير من الوعود والكلام المعسول. جميع عروض الإنترنت في مصر أصبحت محدودة، يعنى رجعنا سنين للخلف، والشركات هتكسب أكتر والبلاد الأخرى هتتقدم عننا أكتر ونفضل في القاع لأن المسؤولين مش بيشتغلوا لصالح الشعب ولكن العكس".
وقال البيان: "وبعدين الوزير بعتلنا دراسات بتقول كمان إن السرعة اللى بناخدها مش بتبقى كاملة دى بتبقى 78% بس منها، وإنه نفسه قال إنها توصل 90%، على الرغم من إن الكلمة دى في حد ذاتها فيها إدانة للوزير، لأن السرعة اللي أنا متعاقد عليها المفروض توصلي كاملة مش 78% منها ولا حتى 90% منها".
وأضاف البيان: "بغض النظر عن العرض المسخرة بتاع 1 ميجا أبو 10 جيجا سعة تحميل ده، كان أقل واجب يتعمل في الأسعار الجديدة اللى هي مضاعفة السرعة يخلى سرعة 1 ميجا بسعة تحميل 250 جيجا بـ95 جنيه في الشهر، الوزير خلاها 100 جيجا بس وبيقنعنا إنه كده عامل واجب وزيادة".